Ստեփանակերտում կյանքը շարունակում է ընթանալ խաղաղ հունով. այս մասին ասվում է ռուս խաղաղապահների զորակազմի թելեգրամյան ալիքում հրապարակված հաղորդագրության մեջ: Դրան կից հրապարակվել է նաև համապատասխան տեսանյութ: 

«Ադրբեջանցիների կողմից խաղաղ բնակչության նկատմամբ բռնաճնշումներ չկան: Քաղաքում պարեկություն է իրականացնում ռուսական խաղաղապահ զորախումբը», - ասվում է հրապարակման մեջ: 

Սեպտեմբերի 19-ին Ադրբեջանը շփման գծի ողջ երկայնքով ռազմական ագրեսիա է սկսել Արցախում՝ դա անվանելով «տեղական բնույթի հակաահաբեկչական միջոցառումներ»՝ իբրև թե «սահմանադրական կարգը վերականգնելու» համար։ Մեկ օր անց ռուս խաղաղապահների միջնորդությամբ պայմանավորվածություն է ձեռք բերվել հրադադարի մասին, հրադադարի պայմանների թվում նախանշվել է, մասնավորապես, Պաշտպանության բանակի զինաթափումը և ծանր տեխնիկայի դուրսբերումն Արցախից։ Սեպտեմբերի 21-ին Ադրբեջանի Եվլախ քաղաքում՝ Ստեփանակերտից 100 կիլոմետր հյուսիս-արևելք, տեղի է ունեցել Արցախի ներկայացուցիչների հանդիպումը Ադրբեջանի պատվիրակության հետ։