«Ինտերի» կիսապաշտպան Հենրիխ Մխիթարյանը միլանյան դերբիում տոնած ջախջախիչ հաղթանակից հետո (5-1) պատասխանել է լրագրողների հարցերին։

«Մենք շատ ուրախ ենք, բայց ես հատկապես երջանիկ եմ։ Ոչ, դա այն պատճառով չէ, որ ես գոլ խփեցի, այլ այն, որ մենք հաղթեցինք և շարունակեցինք մեր հիանալի հաղթարշավն այս մրցաշրջանի սկզբում:

Մեր երկրպագուները հիանալի են, ուզում եմ շնորհակալություն հայտնել նրանց աջակցության համար: Պետք է շարունակենք նույն ոգով։ Տեսնենք, թե դա ուր կտանի:

Թիմի կազմը փոխվել է, բայց մեր նորեկները հիանալի հասկանում են, թե ինչ պահանջներ կան այս ակումբում»,- ասել է Մխիթարյանը DAZN-ին տված հետխաղյա հարցազրույցում։

Հայաստանի հավաքականի նախկին կիսապաշտպան Հենրիխ Մխիթարյանը Whoscored-ի վարկածով ճանաչվել է Իտալիայի առաջնության չորրորդ տուրի «Ինտեր» - «Միլան» հանդիպման լավագույն խաղացող։ Ինտերի կիսապաշտպանը ստացել է 9,5 գնահատականը։ Նա դարձավ երկու գոլի և մեկ գոլային փոխանցման հեղինակ։ 

Երկրորդ լավագույն վարկանիշը տրվել է Ինտերի և աշխարհի չեմպիոն Արգենտինայի հարձակվող Լաուտարո Մարտինեսին։ 

Ինտերը հաղթեց 5:1 հաշվով և 12 միավորով գլխավորում է մրցաշարային աղյուսակը։