«Մենք կարող ենք մեզ թույլ տալ փողը էժանացնել». ԿԲ նախագահը` դրամի հնարավոր արժեզրկման մասին

ՀՀ–ում վերաֆինանսավորման տոկոսադրույքի` 0.25 տոկոսային կետով իջեցումը կարող է ազդել նաև դրամի վրա` արժեզրկելով այն։ Այսօր լրագրողների հետ հանդիպմանը այս հայտարարությունն ասել է ՀՀ կենտրոնական բանկի նախագահ Մարտին Գալստյանը։

«Նախկինում արված մեր աշխատանքի շնորհիվ մենք կարող ենք այսօր մեզ թույլ տալ փողը էժանացնել, որի կողմնակի ազդեցություններից մեկը կարող է լինել, օրինակ, փոխարժեքի փոփոխությունը»,– ասել է ԿԲ նախագահը։

Գալստյանը ևս մեկ անգամ հիշեցրել է, որ ԿԲ–ն առաջնորդվում է գների կայունացման մանդատով և դրա շրջանակում իրենց նպատակակետն է ունենալ 4 տոկոս գնաճ։

ԿԲ նախագահի խոսքով` տրանսֆերների հոսքը դեպի ՀՀ վերջին մեկ–երկու տարվա ընթացքում խիստ պակասել է, որը հիմնականում պայմանավորված է ՌԴ–ում տեղի ունեցող իրադարձություններով։

Դրա փոխարեն Գալստյանը ֆենոմենալ երևույթ է արձանագրել աշխատուժի շուկայում` Հնդկաստանից եկած միգրանտների հոսքը գնալով ավելանում է։

«Նախկինում նման հոսք չկար, վերջին մի քանի տարվա ֆենոմեն է սա։ Սա իր հերթին հետաքրքիր մի իրավիճակ է ստեղծելու, որ ՀՀ–ից նաև դրամական որոշակի արտահոսք է լինելու դեպի այն երկրներ, որտեղից այդ մարդիկ որպես աշխատուժ գալիս են ՀՀ ու կարծում են, որ Հայաստանը ապրելու ու աշխատելու համար նորմալ միջավայր է»,– ընդգծել է նա։

Ինչ վերաբերում է վերարտահանման ծավալներին, ապա ԿԲ նախագահը դժվարացել է կոնկրետ որևէ թիվ ասել, միայն նշել է, որ այս տարի վերարտահանման ծավալները զգալիորեն պակասել են։

Մյուս դրական միտումը Գալստյանը համարել է ՏՏ ոլորտում որակյալ կադրերի հոսքը, որի արդյունքում փոխվել է տվյալ ոլորտում աշխատանքային միջավայրը, այդ թվում` մոտեցումները, մշակույթը, արդյունավետությունը։

Տնտեսական աճի ցուցանիշի վրա մեծ ազդեցություն ունեցող շինարարության ոլորտում ԿԲ–ն ՀՀ կառավարության հետ միասին ձգտում է քանակական տնտեսական աճից անցում կատարել դեպի որակականի` էկոլոգիապես մաքուր շինարարության։

Հիշեցնենք` օգոստոսի 1–ին ՀՀ կենտրոնական բանկի նախագահի տեղակալ Արմեն Նուրբեկյանը հայտարարել էր, որ ՀՀ դրամի արժևորման ճնշումները շարունակվում են։