«Մենք այստեղ չենք եկել նվերներ խնդրելու»․ Հարավաֆրիկյան Հանրապետության նախագահը՝ Պուտինին
Հարավաֆրիկյան Հանրապետության նախագահ Սիրիլ Ռամաֆոսան Ուկրաինայի պատերազմին նվիրված հանդիպման ժամանակ Ռուսաստանի նախագահ Վլադիմիր Պուտինին կոչ է արել վերսկսել հացահատիկի գործարքի աշխատանքը։
«Մենք այստեղ չենք եկել «նվերներ» խնդրելու։ Իհարկե, մենք հասկանում ենք, որ դուք, մեծահոգությունից դրդված, որոշել եք հացահատիկ նվիրաբերել աֆրիկյան որոշ երկրներին, որոնք բախվում են որոշակի դժվարությունների, բայց դա այստեղ գալու մեր հիմնական նպատակը չէ», - ասել է Ռամաֆոսան:
Հարավաֆրիկյան Հանրապետության նախագահն ընդգծել է, որ աֆրիկյան երկրներն առաջարկել են Ռուսաստանին վերսկսել մասնակցությունը հացահատիկի գործարքին և խոսել «Սև ծովը բացելու» անհրաժեշտության մասին, որպեսզի այն «բաց լինի համաշխարհային շուկաների համար»։
Ավելի վաղ Վլադիմիր Պուտինը Ռուսաստան-Աֆրիկա ֆորումի լիագումար նիստում հայտարարել էր, որ Ռուսաստանը պատրաստ է առաջիկա երեք-չորս ամսում աֆրիկյան մի քանի երկրներին անվճար մատակարարել 25-50 հազար տոննա հացահատիկ։
