ՏԵՍԱՆՅՈՒԹ․ Փաշինյանը` բանակցությունների, ռուս-թուրքական հարաբերություններում առկա լարվածության մասին

Կարծում եմ՝  որևէ տեղ, որևէ հարաբերություններում լարվածություն դրական ազդեցություն չի կարող ունենալ: Այս մասին, այսօր՝ հուլիսի 25-ին, մամուլի ասուլիսի ժամանակ նշեց ՀՀ վարչապետ Նիկոլ Փաշինյանը։ 

«Չնայած մյուս կողմից լարվածություն ասվածը նույնպես չպետք է գերագնահատել, որովհետև տեսնում ենք, որ ՌԴ-ն և Թուրքիան, չնայած որոշակի տարաձայնություններին, շատ ակտիվ համագործակցում են: Բոլոր երկրների հարաբերություններում էլ կան հակասություններ, խնդիրն այն է, թե որքանով են դրանք աճում կոնֆրոնտացիոն տրամաբանության»,- ասաց վարչապետ Նիկոլ Փաշինյանը։ 

Նա նաև նշեց, որ ընդհանրապես, հայեցակարգային և ռազմավարական առումով Հայաստանն իր պետականության ամբողջ գոյության ընթացքում եղել և գործել է կոնֆրոնտացիոն տրամաբանության մեջ, որը մեր մեծագույն պրոբլեմն է բոլոր առումներով՝ և՛ անվտանգային, և՛ զարգացման, և՛ միջազգային ազդեցության առումով:

«Այդ տրամաբանության մեջ մենք, ըստ էության, չենք կարողացել եւ չենք կարողանալու ապահովել մեր  երկարատեւ զարգացումը եւ անվտանգության ապահովումը» ,-ասաց նա։ 

Ինչ վերաբերում է այսօր Մոսկվայում Հայաստանի և Ադրբեջանի ԱԳ նախարարների հանդիպումից ակնկալիքներին, Փաշինյանն ասաց. 

«Այդ հանդիպումներն առանձին վերցրած հանդիպումներ չեն, ես ակնկալիք ունեմ մեզանից, Հայաստանի ԱԳ նախարարից և մյուս գործընկերներից, որ նրանք կկարողանան հնարավոր խաղաղության պայմանագրի ևս մի քանի հոդված  համաձայնեցնել և կարողանան ինչ-որ լուծման  հասնել Լաչինի միջանցքի բացման հարցում» ,- նշեց Նիկոլ Փաշինյանը։