Ռուսաստանն ի վիճակի է փոխարինել ուկրաինական հացահատիկը և՛ կոմերցիոն, և՛ անվճար․ Պուտին

Ռուսաստանի նախագահ Վլադիմիր Պուտինը հոդված է գրել «Ռուսաստանը և Աֆրիկան. Միավորելով ուժերը հանուն խաղաղության, առաջընթացի և հաջող ապագայի»: Նա ուրվագծել է երկու երկրների հարաբերությունների առանցքային ոլորտները համատեղ միջոցառումների նախաշեմին, ցանկություն է հայտնել պահպանել տնտեսական կապերը Աֆրիկայի հետ, ինչպես նաև հացահատիկի և պարարտանյութերի մատակարարումը։ 

Հոդվածում Վլադիմիր Պուտինը խոսել է Ռուսաստանի և Աֆրիկայի միջև գործընկերային կապերի «ամուր և խորը» արմատների մասին, որոնք հատկապես կարևոր են «աշխարհի ներկա իրավիճակում», «կայունությունից հեռու»։ Այս պայմաններում, ասվում է հոդվածում, Ռուսաստանը նախատեսում է «աֆրիկացի գործընկերների հետ միասին ձևավորել համագործակցության ոչ խտրական օրակարգ»։ 

Ռուսաստան-Աֆրիկա գագաթնաժողովում, որը տեղի կունենա հուլիսի 27-28-ը Սանկտ Պետերբուրգում, նախատեսվում է ընդունել համապարփակ հռչակագիր, մի քանի համատեղ հայտարարություններ, հաստատել մինչև 2026 թվականը գործընկերության ֆորումի գործողությունների ծրագիրը։ Բացի այդ, ստորագրման է պատրաստվում միջկառավարական համաձայնագրերի ու հուշագրերի փաթեթ։ 

Նախագահը, ի թիվս այլ հարցերի, հիշատակել է հացահատիկի գործարքը՝ քննադատելով դրա իրականացումը պայմանները չկատարելու համար։

«Ուզում եմ ձեզ վստահեցնել, որ մեր երկիրն ի վիճակի է փոխարինել ուկրաինական հացահատիկը և՛ կոմերցիոն, և՛ անվճար, հատկապես, որ այս տարի կրկին ռեկորդային բերք ենք ակնկալում»,- գրել է Պուտինը։ Ռուսաստանը հուլիսի 17-ին դուրս եկավ համաձայնագրից։ 

Հոդվածում պետության ղեկավարը նաև նշել է, որ աֆրիկյան երկրների հետ Ռուսաստանի առևտուրը 2022 թվականին հասել է գրեթե 18 միլիարդ դոլարի, միևնույն ժամանակ, նա նշել է, որ ռուսական ընկերությունները շահագրգռված են ավելի ակտիվ համագործակցությամբ, ներառյալ նոր տրանսպորտային և լոգիստիկ շղթաների ստեղծումը, դրամավարկային և ֆինանսական համակարգի և փոխադարձ հաշվարկների մեխանիզմների ձևավորումը։