Լրացուցիչ կամրջի կառուցումը, որն անհրաժեշտ է Ղրիմի կամրջի վերանորոգման համար, կտևի երկու ամիս։ Այս մասին հայտարարել է ՌԴ փոխվարչապետ Մարատ Խուսնուլինը։ Ըստ նրա՝ վերականգնումը, ըստ նախնական տվյալների, կարժենա 1-1,3 մլրդ ռուբլի, գրում է Kommersant.ru-ն։ 

«Արդեն երեկ մենք սկսել ենք խողովակների և մետաղական կոնստրուկցիաների տեղափոխումը Տոլյատիից։ Մենք այն կկառուցենք երկու ամսում»,- ասել է փոխվարչապետը ռուս սենատորների հետ «Բաց երկխոսության» ժամանակ։ Ժամանակավոր կամուրջը կունենա 250 մ երկարություն, քանի որ ծովից հնարավոր չէ մոտենալ վնասված հատվածին։ 

Այժմ կամրջով երթեւեկությունն իրականացվում է դարձափոխային ռեժիմով։ Մարատ Խուսնուլինի խոսքով՝ Ղրիմի կամրջի մի կողմից երկկողմանի երթևեկությունը կսկսվի մինչև սեպտեմբերի 15-ը, իսկ մյուս կողմից՝ մինչև նոյեմբերի 1-ը։ Մոտ ժամանակներս Ղրիմի կամրջի վրա բեռնատարներ գործարկել չի նախատեսվում՝ անվտանգության նկատառումներից ելնելով, ասել է նա։