Իսրայելի և Ուկրաինայի ՊՆ ղեկավարները քննարկել են Իրանի ազդեցության հետևանքները ուկրաինական պատերազմում
Իսրայելի և Ուկրաինայի պաշտպանության նախարարներ Յոավ Գալանտը և Ալեքսեյ Ռեզնիկովը հեռախոսազրույց են ունեցել։ Այս մասին հայտնում են ուկրաինական ԶԼՄ-ները՝ վկայակոչելով Իսրայելի ՊՆ հաղորդագրությանը։
Նշվում է, որ զրույցի ընթացքում կողմերը քննարկել են Ուկրաինայի մարտական գոտում ստեղծված իրավիճակը և դրա վրա Իրանի ենթադրյալ ազդեցությունը։
«Նախարար Գալանտին զեկուցվել է տեղում տեղի ունեցող զարգացումների մասին։ Նա մտահոգություն է հայտնել Ուկրաինայում հումանիտար իրավիճակի վերաբերյալ։ Կողմերը քննարկել են նաև Իրանի կողմից բխող համատեղ սպառնալիքի հարցը, դրա ազդեցությունն ուկրաինական պատերազմի վրա, ինչպես նաև դրա գլոբալ հետևանքները»,- նշվում է հաղորդագրության մեջ։
Գալանտը զրուցակցին տեղեկացրել է նաև քաղաքացիական օդային հարձակման նախազգուշացման համակարգի տեղակայման առաջընթացի մասին, որի ստեղծմանն օգնում են իսրայելցի մասնագետները Ուկրաինայում։
