Հունաստանում երկու գնացքներ են բախվել. մահացել է 26 մարդ, կա ավելի քան 80 տուժած

Հունաստանում մարդատար և բեռնատար գնացքների բախման հետևանքով զոհվել է 26 մարդ, վիրավորվել՝ 85-ը։ Փրկարարական աշխատանքները շարունակվում են, հայտնում է ERT1-ը՝ հղում անելով Հունաստանի հրշեջ ծառայության պաշտոնական ներկայացուցիչ Վասիլիս Վարտակոյաննիսին։ 

Նրա խոսքով՝ 25 տուժածների վիճակը ծանր է։
 

Վթարը տեղի է ունեցել մարտի 1-ի գիշերը Լարիսա քաղաքի մոտ գտնվող «Evangelismos» կայարանում (Աթենքից ավելի քան 200 կմ հյուսիս-արևմուտք): Ուղևորատար գնացքում, որը շարժվել է Աթենք-Սալոնիկ երթուղով, 350 մարդ է եղել։ Բեռնատար գնացքը շարժվել է Սալոնիկ-Աթենք երթուղով։
 

Թեսալիայի նահանգապետ Կոստաս Ագորաստոսը հայտնել է, որ մարդատար գնացքի առաջին և երկրորդ վագոններն ամբողջությամբ ոչնչացվել են։ Նրա խոսքով՝ բոլոր ուղեւորները դուրս են բերվել, փրկարարները փնտրում են միայն մահացածներին։

Փրկարարական աշխատանքներին մասնակցում է 150 հրշեջ և 32 ոստիկան։ Վթարի վայրում հերթապահում են շտապօգնության 40 մեքենա և պարեկային 15 մեքենա։ Տարհանմանը մասնակցում են նաև ամբարձիչ մեքենաներ։