Ցուցարարներն անարգում են Նահելի հիշատակը․ Ֆրանսիայում զոհված դեռհասի հարազատը՝ BBC-ին
Այն մարդիկ, որոնք անկարգություններ են իրականացնում Փարիզում ու Ֆրանսիայի տարբեր քաղաքներում, որոնք չեն ենթարկվում ոստիկաններին՝ անարգում են Նահելի վառ հիշատակը։ Այս մասին հանրահայտ BBC-ին է ասել Ֆրանսիայում ոստկանի գնդակից զոհված Նահելի հարազատներից մեկը։
Ընտանիքի բարեկամի խոսքով՝ ընտանիքը չի ցանկացել ու չի ցանկանում, որ երիտասարդի մահը երկրում անկարգությունների պատճառ դառնա։
«Մենք երբեք ատելության կոչեր չենք արել»,- BBC-ին է ասել ընտանիքի հարազատը։
Ընտանիքի հարազատները ցուցարարներին կոչ են արել՝ կազմակերպել «սպիտակ երթ», քայլել փողոցներում՝ ի հիշատակ Նահելի,սակայն առանց էմոցիոնալ պոռթկումների։
«Մենք չենք խնդրել ջարդել կամ գողություններ կատարել: Այս ամենը Նահելի համար չէ», - ասել են նրանք BBC-ին։
Նահելի ընտանիքի բարեկամը զրուցի ընթացքում նշել է, որ շարունակվող այս քաոսի արդյունքում ընտանիքը մեկ րոպե չի ունեցել միասին հիշատակելու երիտասարդի հիշատակը։
«Մենք ուզում ենք, որ ամեն ինչ հանդարտվի: Սոցիալական ցանցերն, անկարգություններն, ամեն ինչ պետք է հանդարտվի: Այս ամենի հետ մեկտեղ մենք չենք հասցրել միասին հինգ րոպե նստել և մտածել նրա մահվան մասին»,- ասել է նա:
Հիշեցնենք, որ հունիսի 27-ին Ֆրանսիայի ոստիկանները ճանապարհին ստուգման ժամանակ գնդակահարել էին 17-ամյա դեռահաս մի տղայի՝ Նահել Մ․-ին, որը, ըստ ուժայինների, հրաժարվել էր կատարել իրենց պահանջները: Ֆրանսիայի մի շարք քաղաքներում դեպքից հետո անկարգություններ են սկսվել, որոնք դեռևս շարունակվում են։