Լեգենդար ֆուտբոլիստ Պելեն խոսել է իր հոսպիտալացման մասին
Բրազիլացի լեգենդար ֆուտբոլիստ Պելեն սոցցանցերի իր էջում հայտնել է, որ իր հոսպիտալացումը պլանավորված է եղել։
«Ընկերնե՛ր, ես ամսական այցով հիվանդանոցում եմ։ Միշտ հաճելի է ստանալ դրական հաղորդագրություններ: Շնորհակալություն Քաթարին և բոլոր նրանց, ովքեր ինձ լավ տրամադրություն են հաղորդում»,- գրել է բրազիլական ֆուտբոլի լեգենդը:
Նախօրեին հաղորդվել էր, որ բժիշկները Պելեի մոտ բրոնխոպնևմոնիա են ախտորոշել։
Տեղեկություն կար նաև, որ քաղցկեղի դեմ պայքարող Պելեն հոսպիտալացվել է սրտի անբավարարության և այտուցների պատճառով։
Ֆուտբոլի միջազգային ֆեդերացիայի (ՖԻՖԱ) ֆուտբոլային հանձնաժողովի վարկածով բրազիլացին 20-րդ դարի լավագույն խաղացողն է։ Իր կարիերայի ընթացքում նա 1363 խաղում խփել է 1289 գոլ։
1999 թվականին Միջազգային օլիմպիական կոմիտեն (ՄՕԿ) Պելեին ճանաչել է դարի մեծագույն մարզիկ, չնայած այն հանգամանքին, որ նա երբեք չի մասնակցել Օլիմպիական խաղերին։
