Մեսրոպ Մանուկյանը ԱԺ-ում խոսել է Հայկ Կոնջորյանի եղբոր շուրջ աղմկահարույց դեպքերի մասին

«Հայաստան» խմբակցության պատգամավոր Մեսրոպ Մանուկյանը Ազգային ժողովում խոսել է Հայկ Կոնջորյանի եղբոր հետ կապված միջադեպերի և դրանց արձագանքի մասին:

ԱԺ-ում իր ելույթի ընթացքում «Հայաստան» խմբակցության պատգամավոր Մեսրոպ Մանուկյանը հորդորել է լինել զուսպ և բարեկիրթ՝ դիմելով Հայկ Կոնջորյանին: Նա հիշեցրել է փաստաբանի հայտարարությունը, որի համաձայն «Milion mining» ընկերության սեփականատերերը հայտնել են Կոնջորյանի եղբոր կողմից առերևույթ խարդախություն անելու մասին՝ տան վաճառքի գնի հետ կապված, ինչը, պատգամավորի պնդմամբ, հրապարակայնորեն չի հերքվել: 

Մանուկյանը հարցադրում է արել, թե ինչպես կգնահատվեր նախորդ իշխանությունների օրոք, եթե բարձրաստիճան պաշտոնյայի վարորդական վկայականից զրկված եղբորը մի քանի ամիս անց այն վերադարձնեին ու նոր գործեր հարուցվեին, կամ եթե նա պարեկների ներկայությամբ սեռական հայհոյանքներ տար մարդու տան դիմաց: Նա նշել է, որ ՔՊ-ականներից որևէ մեկը դրան գնահատական չի տվել՝ հավելելով, որ ներողություն խնդրելը պատվաբեր է: 

Պատգամավորը նաև քննադատել է ԱԺ փոխնախագահի պաշտոնում ընտրվող թեկնածուի և Կոնջորյանի ձեռքի շարժումներն ու պահվածքը՝ կոչ անելով հետևել բարեկրթությանը: Արձագանքելով ձեռքերի շարժումների վերաբերյալ դիտարկմանը՝ Ռուբեն Ռուբինյանը նշել է, որ ոչ բոլոր շարժումներն են անընդունելի, կան նորմալ շարժումներ, ինչը «նյուխի» հարց է: