ՖԻՖԱ-ի ղեկավարության շուրջ նոր ճգնաժամ․ Ինֆանտինոյին կոչ են անում հրաժարական տալ

ՈւԵՖԱ-ն, Ասիայի ֆուտբոլի կոնֆեդերացիան (AFC) և Հյուսիսային ու Կենտրոնական Ամերիկայի և Կարիբյան ավազանի ֆուտբոլի կոնֆեդերացիան (CONCACAF) մշակել են գործողությունների ծրագիր, որ ՖԻՖԱ-ի նախագահ Ջանի Ինֆանտինոն հրաժարվի պաշտոնից և 2027 թվականին  չառաջադրվի նախագահի ընտրություններում։ Այս մասին հայտնում է The Times-ը։

Պարբերականի տվյալներով՝ երեք կոնֆեդերացիաների ղեկավարները պատրաստ են «կաթվածահար անել» ՖԻՖԱ-ի աշխատանքը՝ բոյկոտելով կազմակերպության խորհրդի և կոմիտեների նիստերը, ինչպես նաև չվավերացնելով ՖԻՖԱ-ի որոշումները։

Բացի այդ, քննարկվում է այլընտրանքային միջազգային մրցաշարերի ստեղծման հնարավորությունը։ Նշվում է, որ ՈւԵՖԱ-ն դեռ 2017 թվականին մշակել էր գլոբալ Ազգերի լիգայի նախագիծ, որը, սակայն, այդպես էլ կյանքի չէր կոչվել։

Ավելի վաղ հաղորդվել էր, որ Սերբիայի, Ուելսի և Շվեդիայի ֆուտբոլային ֆեդերացիաները հետ են կանչել Ինֆանտինոյի թեկնածությանը  աջակցությունը հայտնելոօ որոշումը 2027 թվականի ընտրություններում։ Reuters-ի տվյալներով՝ նույն քայլին պատրաստվում է նաև Անգլիայի ֆուտբոլի ասոցիացիան։