Թեհրանը Կիևին կոչ է անում համատեղ ուսումնասիրել Ուկրաինայում իրանական ԱԹՍ-ների մասին տվյալները

Թեհրանը Կիևին կոչ է անում փորձագիտական ​​մակարդակով երկկողմ հանդիպում անցկացնել՝ ուսումնասիրելու Ուկրաինայում իրանական անօդաչու թռչող սարքերի օգտագործման վերաբերյալ տվյալները։ Այս մասին հինգշաբթի հայտարարել է Իրանի արտաքին գործերի նախարարության պաշտոնական ներկայացուցիչ Նասեր Քանանին, գրում է ՏԱՍՍ-ը:

«Էմոցիոնալ հայտարարություններն ու պնդումները չեն նպաստում ուկրաինական ճգնաժամի հանգուցալուծմանը: Իրանին անհիմն պահանջներ ներկայացնելու փոխարեն այս երկրի իշխանությունները պետք է արձագանքեն մեր կառուցողական առաջարկներին և փորձագիտական ​​մակարդակով երկկողմ հանդիպում անցկացնեն՝ փաստաթղթային ապացույցներն ուսումնասիրելու համար»,- Քանանիի խոսքերը մեջբերում է երկրի ԱԳՆ կայքը։

ԱԳՆ խոսնակը հերթական անգամ հերքել է այն պնդումները, թե Իրանը Ռուսաստանին զենք է մատակարարում Ուկրաինայում օգտագործելու համար։ Նա նաև ընդգծել է, որ Թեհրանը պատրաստ է դիվանագիտական ​​ջանքեր գործադրել Ռուսաստանի և Ուկրաինայի միջև հակամարտությունը լուծելու համար։

Հիշեցնենք, որ Իրանի ԱԳ նախարար Հոսեյն Ամիր Աբդոլլահիանը սեպտեմբերի վերջին ասել էր, որ Թեհրանը չի աջակցում Ուկրաինայի հակամարտության կողմերից ոչ մեկին և դեմ է թե՛ Կիևին, թե՛ Մոսկվային օտարերկրյա զենք մատակարարելուն։