Բրիտանական Skyrora-ի՝ տիեզերք հրթիռ արձակելու առաջին փորձն ավարտվել է անհաջողությամբ
Բրիտանական Skyrora մասնավոր ընկերության՝ տիեզերք հրթիռ արձակելու առաջին փորձն ավարտվել է անհաջողությամբ՝ սարքն ընկել է ծովը։ Այս մասին հայտնում է BBC-ի ռուսական ծառայությունը։
Արձակումը տեղի է ունեցել Իսլանդիայի Լանգանես թերակղզում։ Skylark L հրթիռը պետք է բարձրանար 100 կմ-ից վեր, սակայն տեխնիկական խնդիրների պատճառով այն ընկել է ջուրը արձակման հարթակից ընդամենը կես կիլոմետր հեռավորության վրա։
«Չնայած այս արձակման փորձը չանցավ ճիշտ այնպես, ինչպես մենք ակնկալում էինք, այն, այնուամենայնիվ, դասեր քաղելու արժեքավոր հնարավորություն էր և հսկայական հաղթանակ Իսլանդիայի և Մեծ Բրիտանիայի միջև նոր հարաբերությունների և ընդհանուր առմամբ եվրոպական տիեզերական հատվածի համար», - ասել է Skyrora-ի գործադիր տնօրեն Վլադիմիր Լևիկինը:
Նշվում է, որ նախկինում Skyrora-ն 30 կմ-ից ցածր բարձրության վրա մթնոլորտ է արձակել փոքր գերձայնային մեքենաներ:
Skylark L-ն աշխատում է կերոսինի և ջրածնի պերօքսիդի վրա: Այն նախատեսված է նավի վրա գտնվող գիտական գործիքներին փորձերի համար մի քանի րոպե անկշռություն տալու համար:
