ՏԵՍԱՆՅՈՒԹ.Ընդդիմադիր ուժերը միասնական օրակարգով դիմել են ՍԴ. Իվետա Տոնոյան

Սահմանադրական դատարանի (ՍԴ) բակում լրագրողների հետ զրույցում Իվետա Տոնոյանը հայտարարել է, որ խոշորագույն ընդդիմադիր քաղաքական ուժերը միասնական օրակարգով դիմում են ներկայացրել Սահմանադրական դատարան:

Նրա խոսքով՝ «Բարգավաճ Հայաստան» կուսակցության (ԲՀԿ) հայցն առանձնանում է նրանով, որ ընտրությունները անվավեր ճանաչելու պահանջից բացի, ներառում է նաև մանդատների վերաբաշխման գործընթաց իրականացնելու դիմում: Եթե երեք ընտրատեղամասերում ընտրությունների արդյունքների անվավեր ճանաչումը հակասահմանադրական որակվի, ապա ավտոմատ կերպով կիրականացվի մանդատների վերաբաշխում: Տոնոյանը շեշտել է, որ պայքարն ամենևին խորհրդարանում ԲՀԿ-ի ներկայությունն ապահովելու կամ մանդատներ ստանալու համար չէ: Ըստ նրա՝ երեք ընտրատեղամասերի արդյունքների անվավեր ճանաչումն ունի հակաօրինական ու հակասահմանադրական դրսևորումներ, և եթե ՍԴ-ն դրական որոշում չկայացնի, իշխանությունը հաջորդ ընտրություններում նույն սկզբունքով կարող է անվավեր ճանաչել իրեն չգոհացնող տեղամասերի արդյունքները, ինչը վատ նախադեպ կդառնա:

Բանախոսը նշել է, որ հունիսի 7-ին հաջորդած ժամանակահատվածում ընդդիմությունը բավականին կառուցողական և համակարգված աշխատում է միասնական դաշտում: Նա հունիսի 7-ի իրադարձություններն անվանել է թվաբանական մանիպուլյացիաներ և Կենտրոնական ընտրական հանձնաժողովի կողմից իրականացված աճպարություններ, որոնց ականատես է եղել ամբողջ քաղաքակիրթ աշխարհը: Տոնոյանը հավելել է, որ մարդկայնորեն ցավ է ապրում՝ տարբեր միջազգային կառույցներից ու արտերկրի ներկայացուցչություններից Հայաստանում ոչ ժողովրդավարական և ոչ լեգիտիմ ընտրությունների անցկացման մասին լսելիս:

Անդրադառնալով հետագա անելիքներին՝ Իվետա Տոնոյանը հայտնել է, որ այս պահին հաջորդող քայլերի վերաբերյալ քննարկումներ կամ օրակարգ չկան, քանի որ իրենք սպասում են հուլիսի 4-ին կայացվելիք Սահմանադրական դատարանի որոշմանը: Ըստ նրա՝ գնդակը գտնվում է ՍԴ խաղադաշտում, և հետագա բոլոր զարգացումներն ու հետևանքները բխելու են այդ որոշումից: Նա վերահաստատել է, որ օգտագործելու են բոլոր իրավական ու օրինական գործիքները արդարության վերականգնման համար: