Երևանի Ավետ Ավետիսյան փողոցը հիմնանորոգումից հետո

Ապրիլի 3-ին Երևանի Ավետ Ավետիսյան փողոցը փակվեց։ Պատճառը՝ հիմնանորոգումն էր։ Բնակիչներն ու վարորդները զինվեցին համբերությամբ ու սպասեցին ուղիղ 3 ամիս։ 

Շինարարական աշխատանքներն ավարտվեցին, փողոցը բացվեց, բայց սպասված հարթ ասֆալտի փոխարեն մարդիկ այլ պատկեր ստացան։

Մեզ ահազանգած քաղաքացիները դժգոհում են՝ ճանապարհը հարթ չէ, դիտահորերը տեղադրված են ասֆալտի նիշից ցածր։


Ինչո՞ւ է 3 ամիս տևած աշխատանքից հետո փողոցն այս վիճակում հանձնվել վարորդներին։ Մեր հարցմանն ի պատասխան՝ Երևանի քաղաքապետարանից պարզաբանեցին՝ ճանապարհը բացել են երթևեկությունը թեթևացնելու համար, բայց շինարարությունն իրականում դեռ չի ավարտվել։

Ծրագիրը ընթացքի մեջ է. քաղաքապետարանից հավաստիացնում են, որ առաջիկայում բոլոր դիտահորերը կբերվեն ասֆալտի ճիշտ մակարդակին (նիշին), և կիրականացվեն համապատասխան գծանշումները։

Թե որքան պետք է սպասեն վարորդները մինչև կիսատ գործն ավարտին հասցվի, և արդյո՞ք նոր ասֆալտը կդիմանա այս ծանրաբեռնվածությանը՝ ցույց կտա ժամանակը։