Փոխվարչապետ Մհեր Գրիգորյանն ու ՏԿԵ նախարար Դավիթ Խուդաթյանն այցելել են ՀԱԷԿ

ՀՀ տարածքային կառավարման և ենթակառուցվածքների նախարար Դավիթ Խուդաթյանն այսօր փոխվարչապետ Մհեր Գրիգորյանի ուղեկցությամբ այցելություն է կատարել Հայաստանի ատոմային էլեկտրակայան (ՀԱԷԿ)։

Պաշտոնյաները նախ շրջայց են կատարել ատոմակայանի տարածքում, ինչից հետո անցկացվել է ընդլայնված կազմով աշխատանքային խորհրդակցություն։

Հանդիպմանը մասնակցել են նաև ՏԿԵ նախարարի տեղակալ Նարեկ Ապիտոնյանը, ՀԱԷԿ-ի գլխավոր տնօրեն Էդուարդ Մարտիրոսյանը, Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանը, Միջուկային անվտանգության կոմիտեի տնօրենի պարտականությունները կատարող Խաչատուր Խաչիկյանը, ինչպես նաև էներգետիկ համակարգի պատասխանատու այլ ընկերությունների ղեկավարներ։

Խորհրդակցության ընթացքում Էդուարդ Մարտիրոսյանը ներկաներին է ներկայացրել ՀԱԷԿ-ի 2-րդ էներգաբլոկի շահագործման ժամկետի երկարաձգմանն ուղղված միջոցառումների և աշխատանքների ներկայիս ընթացքը։ Օրակարգում եղել են նաև էներգետիկ բնագավառին վերաբերող մի շարք այլ հույժ կարևոր խնդիրներ։