Ժողովրդի ճնշող մեծամասնությունը ձայն է տվել ընդդիմությանը. Գառնիկ Դանիելյան

Հունիսի 26-ին Սահմանադրական դատարանի դիմաց ընդդիմադիր քաղաքական ուժերի համատեղ բողոքի ակցիայի ժամանակ «Հայաստան» խմբակցության պատգամավոր Գառնիկ Դանիելյանը հայտարարել է, որ չնայած բազմաթիվ բռնաճնշումներին, աշխատանքից ազատումներին ու վախի մթնոլորտին, ժողովրդի ճնշող մեծամասնությունը ձայն է տվել ընդդիմությանը:

Պատգամավորի պնդմամբ՝ անգամ արձանագրված «նկարչության» պայմաններում հարյուր հազարավոր քաղաքացիներ մերժել են գործող իշխանությանը, որը հանձնել է Արցախը, արշավել սեփական եկեղեցու դեմ և շարունակաբար զիջումների գնացել ու խոստումներ տվել թուրքերի ու ադրբեջանցիների առաջ՝ անտեսելով հայրենիքն ու ժողովրդին: Դանիելյանը քննադատել է ընտրական գործընթացը՝ նշելով, որ իշխանությունը գիշերը գաղտնագողի թվեր է հրապարակել և հաղթանակ հայտարարել այն ժամանակ, երբ ընտրատեղամասերում քվեաթերթիկների կեսն անգամ հաշվարկված չի եղել: Նա հավելել է, որ իշխանությունը չի հաղթել ժողովրդին, այլ պարտվել է սրբազաններին ու հանրությանը:

Գառնիկ Դանիելյանը կոչ է արել դուրս գալ հուսահատությունից՝ հավաստիացնելով, որ քրեակատարողական հիմնարկներում գտնվող սրբազանների, ազգային բարերարի և քաղաքական գործիչների շրջանում հուսահատության ոչ մի նշույլ չկա: Նա ողջունել է անազատության մեջ գտնվող հայրենակիցներին և համոզմունք հայտնել, որ Հայաստանի նորագույն պատմության մեջ ոսկե տառերով է գրվելու այն պայքարող տեսակը, որն ազատագրելու է երկիրը: