ՍԴ-ն պետք է պաշտպանի քաղաքացու սահմանադրական իրավունքը. Արման Աբովյան

Հունիսի 26-ին Սահմանադրական դատարանի դիմաց ընդդիմադիր քաղաքական ուժերի համատեղ բողոքի ակցիայի ժամանակ «Բարգավաճ Հայաստան» կուսակցության (ԲՀԿ) ցուցակում ընդգրկված Արման Աբովյանը շնորհակալություն է հայտնել անտարբերությունից հրաժարված քաղաքացիներին, քանի որ մարդը չի կարող անտարբեր լինել սեփական երեխայի ապագայի հանդեպ:

Նրա խոսքով՝ ներկայիս գործընթացները միայն ԲՀԿ-ին չեն վերաբերում, և խնդիրը կուսակցության անցնելը կամ մանդատները չեն: Աբովյանն ընդգծել է, որ չի կարելի թույլ տալ որևէ ձայնի յուրացում կամ գողություն, քանի որ եթե ՀՀ քաղաքացու ձայնը, անկախ իրենց հետ համաձայն լինել կամ չլինելուց, արժեզրկվում է, ապա վաղը բոլորին են արժեզրկելու՝ առանց հաշվի առնելու անձերի ով լինելը: Բանախոսը նշել է, որ բոլորն էլ լարված վիճակում են, սակայն Սահմանադրական դատարանից ակնկալվում է բացառապես մեկ բան՝ պաշտպանել Սահմանադրությամբ ամրագրված քաղաքացու իրավունքը և ապահովել երկրի Մայր օրենքի դրույթների կատարումը:

Սահմանադրական դատարանի շենքի դիմաց ընթացող բողոքի ակցիային հավաքվել են ընդդիմադիր քաղաքական ուժերի ներկայացուցիչներն ու նրանց կողմնակիցները: Համատեղ միջոցառմանը մասնակցում են «Ուժեղ Հայաստան» դաշինքը, «Հայաստան» դաշինքը, ԲՀԿ ներկայացուցիչները, ինչպես նաև «Հայաքվե» նախաձեռնության անդամները: Հիշեցնենք, որ այսօր ՍԴ-ում մեկնարկել է Ազգային ժողովի ընտրությունների արդյունքները վիճարկող 7 քաղաքական ուժերի ներկայացրած դիմումների քննությունը: