Ընդդիմությունը պատրաստ է ցանկացած զարգացման և արժանի հակահարվածի. Լևոն Քոչարյան

Սահմանադրական դատարանի դիմաց ընդդիմադիր քաղաքական ուժերի կազմակերպած բողոքի ակցիայի ժամանակ «Հայաստան» դաշինքի անդամ Լևոն Քոչարյանը լրագրողների հետ զրույցում անդրադարձել է այն դիտարկմանը, որ նախորդ գումարման խորհրդարանում հաճախակի էին ծեծի տեսարանները, իսկ նախընտրական քարոզարշավն անցել է «համբալներ, կզցնելու եմ» խոսույթի ներքո, և հարցին, թե արդյո՞ք ընդդիմության՝ խորհրդարան մտնելու պարագայում նորից ծեծի տեսարաններ կլինեն։

Լևոն Քոչարյանը նշել է. «Եթե ընդդիմությունը խորհրդարան գնալու որոշում կայացնի, ապա այդ ամենին պատրաստ պետք է լինի։ Ով ընդդիմադիր է, ով պայքարի մեջ է, ամեն ինչի էլ պատրաստ է․ պատրաստ ենք, որ մեքենայով քաղաքով գնալուց կարող են կանգնեցնել ու ինչ-որ գործողություններ անել։ Հիմա նաև հարկային տեռոր է․․․ Այսինքն՝ ամեն ինչի էլ պատրաստ ենք, մեր խնդիրն է լինելու այդ ամենին ճիշտ դիմակայելն ու արժանի հակահարված տալը»։

Այն հարցին, թե արդյոք պատրաստ են ծեծվելու, Քոչարյանը պատասխանել է. «Բայց ինչի՞ ծեծվելու, և ոչ թե, օրինակ, ծեծելու։ Պետք է ավելի ուժեղ լինենք ու պատրաստված լինենք նաև այդ առումով»։