Վրաերթի ենթարկված կնոջ մոտ գրանցվել է շնչառության և սրտի կանգ. բժիշկ. News am

Երեւանի Լեո-Պարոնյան-Պռոշյան փողոցների հատվածում վրաերթի ենթարկված 29-ամյա կնոջ մոտ ընդունման պահին գրանցվել է շնչառության եւ սրտի կանգ, նա եղել է հղի: Այս մասին  News.am-ին հայտնեց «Նաիրի» բժշկական կենտրոնի գլխավոր բժիշկ Անատոլի Գնունին:
 

«Հիվանդանոց ընդունման պահին գրանցվել է շնչառության եւ սրտի կանգ, անմիջապես սկսվել են ռեանիմացիոն գործողություններ, որոնք տեւել են 1.5 ժամ, ցավոք ռեանիմացիոն գործողությունները եղել են ապարդյուն, գրանցվել է կենսաբանական մահ: Նաեւ ստուգվել է պտղի բաբախը, որը բացակայում էր»,- ասաց նա:
 

Հիշեցնենք, որ ժամեր առաջ մենք գրել էինք, որ Լեո-Պարոնյան հատվածում կառավարական շարասյունը երիտասարդ հղի կնոջ է վրաերթի ենթարկել:

Ապրիլի 26-ին՝ ժամը 18․24-ին, ոստիկանության օպերատիվ կառավարման կենտրոնում հաղորդում է ստացվել, որ Լեո-Պարոնյան փողոցների խաչմերուկի մոտ ամենագնացը վրաերթի է ենթարկել մի կնոջ։ Այս մասին հայտնում է ՀՀ Ոստիկանությունը։  Նախնական տվյալներով՝ քաղաքացուհին վրաերթի է ենթարկվել Ճանապարհային ոստիկանության «Տոյոտա» մակնիշի ավտոմեքենայով, որը գտնվել է ծառայության մեջ։ Վրաերթի ենթարկվածը տեղափոխվել է «Նաիրի» բժշկական կենտրոն։ Հանգամանքները քննությամբ պարզվում են։