Ուկրաինայում սկսվում է հատուկ գործողության հաջորդ փուլը․ Լավրով

Ռուսաստանի արտգործնախարար Սերգեյ Լավրովը India Today-ին տված հարցազրույցում ասել է, որ Ռուսաստանը չի դիտարկում Ուկրաինայում միջուկային զենք կիրառելու հնարավորությունը։ 

«Միայն սովորական սպառազինություն»,- ասել է Լավրովը։

ԱԳՆ ղեկավարի խոսքով՝ հենց Ռուսաստանն է միշտ հայտարարել, որ միջուկային պատերազմ չի կարող լինել։ Դա ուղղակի աներևակայելի է, հավելել է Լավրովը։

ՌԴ ԱԳ նախարար Լավրովն Ուկրաինայում հատուկ գործողության պատճառ է անվանել ՆԱՏՕ-ի առաջխաղացումը դեպի արևելք, երբ նախկին ԽՍՀՄ հանրապետություններում ստեղծվեցին այդ «պաշտպանական» դաշինքի առաջադեմ հարձակողական բազաները։ 

«Կարող եմ ձեզ ևս մեկ անգամ հավաստիացնել, որ մեր բանակը գործում է ռազմական ենթակառուցվածքների, այլ ոչ թե խաղաղ բնակչության դեմ», - ասել է Լավրովը։ 

Վերջինս հայտարարել է, որ Ռուսաստանը կպարզի Բուչայում տեղի ունեցածի մասին ճշմարտությունը: Լավրովի խոսքով՝ Ուկրաինայում սկսվում է հատուկ գործողության հաջորդ փուլը։