«Մեկընդմիշտ փակենք այդ թեման, ինձ որևէ մեկը որևէ բան չի փոխանցել»․ Վալերի Օսիպյան

Ազատության հրապարակում լրագրողների հետ զրույցում նախկին փոխոստիկանապետ Վալերի Օսպիպյանն ասաց, որ Հնարավոր է կանխել հայրենիքի մնացած մասի կորուստը, անհնարին ոչինչ չկա։

Անդրադառնալով Նիկոլ Փաշինայնի այն հայտարարությանը, որ կարող էինք կանխել պատերազմը, բայց կլիներ նույն վիճակը՝ առանց զոհերի, և այն հարցին՝ արդյոք նման հայտարարությանը իրավական գործընթաց չպետք է հետևեր, Օսիպյանն ասաց․

«Այստեղ արդեն լուրջ մոտեցում է անհրաժեշտ, իրավապահները պետք է դա հասկանան, զավակ կորցրած ծնողները պետք է սա նկատի ունենան»։

Խոսելով երեկ Ազատության հրապարակում ոստիկանների կողմից ակցիայի մասնակիցների նկատմամբ ուժ կիրառելու և ազատ տեղաշարժը սահմանափակելու գործողություններին, Օսիպյանը նշեց․

«Պատգամավորների և առհասարակ քաղաքացիների ազատ տեղաշարժը սահմանափակելը անթույլատրելի եմ համարում, կոչ եմ անում իմ նախկին գործընկերներին առաջնորդվել միայն օրենքով և հիշել, որ սխալ հրամաններ կատարողները ուշ թե շուտ պատասխան են տալու։ 2018 թ-ին եղել են դեպքեր, երբ ես եմ իմ գործընկերներին խնդրել, որ իրենց գործողությունների արդյունքում հետապնդումներ չլինեն»։

Անդրադառնալով տարածված այն քննարկումներին, որ 2018թ-ի հեղափոխության օրերին տարածված մի տեսանյութում երևում է, որ Նիկոլ Փաշիւնյանը իրեն թուղթ է փոխանցել, Օսպիպյանն ասաց․

«Ուզում եմ անդրադառնալ և մեկընդմիշտ փակենք այդ թեման, ինքս բազմիցս տեսել եմ այդ տեսանյութը, ինձ որևէ մեկը որևէ բան չի փոխանցել, տեղյակ չեմ՝ ինչի մասին է խոսքը գնում,  ամենայն ազնվությամբ եմ պատասխանում, միգուցե կգա ժամանակը, երբ կպարզենք, թե ում է ինչ փոխանցել, բայց այս պահին ասում եմ այն, ինչից տեղյակ եմ»։