Ռուսաստանն ու Հայաստանը մտադիր են համատեղ աշխատել պատժամիջոցների պատճառով առաջացած խնդիրները հաղթահարելու համար
Հանդիպումից հետո ՌԴ նախագահ Վլադիմիր Պուտինը և Հայաստանի վարչապետ Նիկոլ Փաշինյանը պայմանավորվել են, որ երկրները համատեղ կհաղթահարեն մի շարք երկրների կողմից կիրառվող միակողմանի սահմանափակումների հետևանքով առաջացած մարտահրավերները։ Այս մասին գրում է RT-ն՝ հղում տալով Կրեմլի պաշտոնական հաղորդագրությանը:
«Պուտինն ու Փաշինյանը մտահոգություն են հայտնել մի շարք երկրների կողմից միակողմանի սահմանափակող միջոցների կիրառման կապակցությամբ։ Մենք մեր մտադրությունն ենք հայտնել համատեղ հաղթահարել այս միջոցառումների հետևանքով առաջացած մարտահրավերները»,- ասվում է համատեղ հայտարարության մեջ։
Խոսքը, ի թիվս այլ հարցերի, երկու երկրների պարենային և էներգետիկ անվտանգության, ինչպես նաև լոգիստիկայի ոլորտի մասին է։
