Չինաստանի ԱԳ նախարարն ասել է, թե որն է ուկրաինական ճգաժամի պատճառը

Ուկրաինայում ներկայիս ճգնաժամի հիմնական պատճառներից մեկը Եվրոպայի անվտանգության առկա մեխանիզմներում անհավասարակշռությունն է։ Այս մասին հայտարարել է Չինաստանի ԱԳ նախարար Վան Ին՝ Ֆրանսիայի նախագահ Էմանուել Մակրոնի դիվանագիտական խորհրդատուի հետ հեռախոսազրույցում, փոխանցում է «Москва 24»-ը։

 «Անհրաժեշտ է հետևել անվտանգության անբաժանելիության սկզբունքին և վերստեղծել Եվրոպայում անվտանգության հավասարակշռված և արդյունավետ մեխանիզմy։ Միայն այդպես է հնարավոր Եվրոպայում հաստատել երկարաժամկետ խաղաղություն և կայունություն»,-ասել է չինացի դիվանագետը։ Նա նաև նշել է, որ բոլոր կողմերը պետք է նպաստեն Ռուսաստանի և Ուկրաինայի միջև խաղաղ բանակցություններին և դրանց համար ստեղծեն անհրաժեշտ պայմաններ։ 

«Չի կարելի կրակի և մարտական գործողությունների դադարեցման կոչ անել և միաժամանակ անդադար մեծաքանակ սպառազինություն մատակարարել՝ առաջացնելով ռազմական գործողությունների էսկալացիա»,-հավելել է նա։