Մենք պետք է շարունակենք զինել Ուկրաինային, որպեսզի նա չպարտվի․ Բորել

ԵՄ-ն չի ցանկանում, որ Ուկրաինան պարտություն կրի Ռուսաստանի հետ հակամարտությունում, ուստի կշարունակի զինել նրան, ասել է ԵՄ դիվանագիտության ղեկավար Ժոզեպ Բորելը Ստրասբուրգում Եվրախորհրդարանի լիագումար նիստում պատգամավորների հետ խոսելով։ Այս մասին տեղեկանում ենք ՌԻԱ «Նովոստի»-ից։

«Այս խորհրդարանում նրանք ինձ ասացին, որ անհրաժեշտ է որքան հնարավոր է շուտ դադարեցնել հակամարտությունը, ինչի համար անհրաժեշտ է դադարեցնել Ուկրաինային զինելը: Բայց եթե ամեն ինչ ավարտվի կործանված և պարտված երկրում միլիոնավոր փախստականներով և հազարավոր զոհերով, ուրեմն մենք դա չենք ուզում, ուստի մենք պետք է շարունակենք զինել Ուկրաինային»,- ասել է նա։ 


Եվրոպական դիվանագիտության ղեկավարը նաև ասել է, որ մեկ միլիարդ եվրոն, որը ԵՄ-ն հատկացրել է ուկրաինական բանակին ռազմական օգնության ֆինանսավորման համար, «այնքան էլ էական գումար չէ՝ հաշվի առնելով, թե ԵՄ-ն օրական որքան է ծախսում Ռուսաստանի Դաշնությունում վառելիքի գնումների վրա»։