ԵՄ-ն քննադատել է Չավուշօղլուի հայտարարությունները
Եվրոպական միությունը Թուրքիային կոչ է արել հարգել Հունաստանի ինքնիշխանությունը և հունական կղզիների մասին Թուրքիայի արտործնախարարի հայտարարություններն անվանել է հակաարդյունավետ, հաղորդում է Interfax գործակալությունը։
Ըստ Եվրամիության արտաքին գերատեսչության տարածած հաղորդագրության՝ Մևլութ Չավուշօղլուի հայտարարությունները հակասում են արևելյան Միջերկրածովյան տարածաշրջանում ապաէսկալացմանը։ Հաղորդագրությունում ընդգծվում է, որ Հունաստանի ինքնիշխանությունն այդ կղզիների նկատմամբ կասկածի ենթակա չէ։
«Թուրքիան պետք է հարգի այն, զերծ մնա այդ առնչությամբ սադրիչ հայտարարություններից և գործողություններից, անվերապահորեն հավատարիմ մնա բարիդրացիական հարաբերություններին և աշխատի ցանկացած վեճ կարգավորել խաղաղ ճանապարհով», – նշված է հաղորդագրությունում։
Օրերս Թուրքիայի արտգործնախարարը հարցազրույցի ընթացքում հերթական անգամ բարձրացրել էր մի շարք հունական կղզիների ապառազմականացման և ինքնիշխանության հարցը։ Նա հայտարարել էր, որ Աթենքի կողմից այդ կղզիների շարունակվող ռազմականացումը կասկածի տակ է դնում նրանց ինքնիշխանությունը։
