Ինչո՞ւ է պասիվացել «Ազգային ազատագրական շարժումը». Հոխիկյանը մեկնաբանում է

«Ազգային ազատագրական շարժման» հիմնադիր-անդամ, հեռուստամեկնաբան Նաիրի Հոխիկյանն ArmDaily.am-ի հետ զրույցում տեղեկացրեց, որ իրենք շարունակում են աշխատել։

Հոխիկյանը նշեց, որ իրենց աշխատանքն այս պահին ոչ թե պասիվ է, այլ անտեսանելի և հավելեց, որ դեռևս մի քանի օր առաջ իրենց դեմ մեղադրանքներ էին հնչում այն մասին, որ իրենց շարժման վերջն եկավ, պառակտվեց, որ իրենք այլևս ոչ մի բան չեն անում և հանկարծ իրենք մտնում են Արտաքին գործերի նախարարություն և կոնկրետ գործողություն արեցին։

«Մենք պասիվ չենք և օրինակ երեք օր առաջ մենք մեծ ավտոերթ արեցինք՝ Ծիծեռնակաբերդից դեպի Սարդարապատ և իրազեկման ավտոերթ էր, Հայաստանի 15 համայնքներում պտտվեցինք մեկ օրվա ընթացքում և Արմավիրի, Արարատի մարզերում և Երևանում։ Եվ իրազեկման ակցիաներ արեցինք, ինչպես և նախոօրոք էինք հայտարարել, մենք համայնք առ համայնք գնում ենք, մարդկանց տեղեկացնում ենք մեր երկրին սպառնացող վտանգների, դրանց լուծման մասին»,-ասաց Հոխիկյանը։

Իսկ Երևանում սպասվելիք ակցիաներ նախատեսում են, սակայն այս նախատոնական շրջանում գիտակցում են, որ ձմեռ է, ցուրտ է, մարդիկ ամանորին են պատրաստվում և նրանց հրապարակ դուրս բերելը այնքան էլ ճիշտ չէ։

«Նախընտրում ենք հրապարկներում հավաքներ անելու փոխարեն գնալ համայնքներ, մարդկանց հետ անհատապես, տուն առ տուն, խոսել, ներկայացնել»,-ասաց Հոխիկյանը։