«Լիստվյաժնայա» ածխահանքում 51 մարդու կյանք խլած վթարից հետո Կուզբասի մյուս հանքերում ավելի քան 400 խախտումներ են հայտնաբերվել

ՌԴ Գլխավոր դատախազությունը, «Լիստվյաժնայա» ածխահանքում տեղի ունեցած վթարից հետո ստուգումներ է սկսել Կուզբասի հանքերում, որոնց արդյունքում հայտնաբերվել է 449 խախտում, հաղորդում է վարչությունը։ 

Ինչպես հայտնում են ռուսական լրատվամիջոցները, հղում տալով, գերատեսչության հաղորդագրությանը, հարուցվել է վարչական իրավախախտման 180, անփութության 1 քրեական գործ։

Հիմնական խախտումները կապված են անվտանգության միջոցառումների, հանքագործների աշխատանքային ժամերի  չպահպանման, անձնական պաշտպանիչ սարքավորումների և հանդերձանքի չապահովման հետ:

Կեմերովոյի մարզի Բելովսկի քաղաքային թաղամասի Լիստվյաժնայա հանքավայրում նոյեմբերի 25-ի առավոտյան արտակարգ դեպք էր տեղի ունեցել։ Ողբերգության հետևանքով զոհվել է 51 մարդ, այդ թվում՝ հինգ փրկարար։

Պաշտոնական տվյալներով տուժել է 76 մարդ, որոնցից 64-ը հոսպիտալացվել են։

Կուզբասի իշխանությունները վթարի հավանական պատճառ են նշել մեթանի պայթյունը, ստույգ պատճառները կպարզի հատուկ հանձնաժողովը։