Ադրբեջանցի պատգամավորը նոր պատերազմով է սպառնացել Փաշինյանին և Հայաստանին
Ադրբեջանը շարունակում է նոր պատերազմի սպառնալիքներ հնչեցնել Հայաստանի և Արցախի դեմ և շահարկել հրադադարի ռեժիմի եռակողմ հայտարարությունը՝ աղավաղելով դրա բովանդակությունը: Տեղեկությունը հայտնում է Инфотека 24 թելեգրամյան ալիքը՝ հղում անելով ադրբեջանական լրատվականներին։
Թելեգրամյան ալիքը հայտնում է, որ Ադրբեջանի խորհրդարանի իշխող խմբակցության անդամ Ազեր Բադամովը Հայաստանի անկախության 30 -ամյակին նվիրված միջոցառման ժամանակ ադրբեջանական լրատվակններից մեկի հետ զրույցում մեկնաբանել է Հայաստանի վարչապետ Նիկոլ Փաշինյանի խոսքերն Արցախի մասին: Բադամովը նշել է, որ Արցախ չկա այլևս, բարգավաճման մասին խոսք լինել չի կարող, ևՂարաբաղյան երկրորդ պատերազմում զոհված հայերը «դարձան Հայաստանի զոհը»:
«Կարծես թե Փաշինյանը մոռացել է այն պայմանները, որոնցով նա ստորագրեց հանձնման փաստաթուղթը նոյեմբերի 10 -ին: Հայտնի չէ, թե ինչ Արցախի Հանրապետության մասին է խոսքը։ Նրա ստորագրած եռակողմ հայտարարության մեջ չկա Արցախի հետ կապված և ոչ մի արտահայտություն: Այսօր այնտեղ կա հայերով բնակեցված ադրբեջանական տարածք, և այն վերահսկում են ռուս խաղաղապահները: Ռուս խաղաղապահներն այնտեղ մուտք են գործել Ադրբեջանի թույլտվությամբ և կհեռանան Ադրբեջանի խնդրանքով», - ասել է պատգամավորը:
Նա նաև ընդգծել է, որ, ըստ հայտարարության, հայկական զինված կազմավորումները պետք է լքեն Ղարաբաղը:
«Փաշինյանը չպետք է մոռանա, որ Ադրբեջանը համբերատար է և սպասում է, երբ ժամանակը գա: Փաշինյանը կարծես սկսել է մոռանալ «երկաթե բռունցքից» ցավի մասին: Եթե այսպես շարունակվի, մեզ հարկավոր կլինի երկրորդ անգամ օգտագործել երկաթե բռունցքը: Եթե «երկաթե բռունցքը» երկրորդ անգամ գործարկվի, ապա դա կլինի Հայաստանի վերջը: Փաշինյանը պետք է հասկանա, որ պետք է հրաժարվի իր ռասիստական հռետորաբանությունից, հայտարարի Ադրբեջանի հետ հնարավորինս շուտ հաշտության պայմանագիր կնքելու պատրաստակամության մասին, ինչը ճանապարհ կբացի Հայաստանի ապագա անկախության համար», - ասել է ադրբեջանի իշխող խմբակցության պատգամավորը:
Հայաստանն իր հերթին հետևողականորեն հանդես է գալիս տարածաշրջանում խաղաղության հաստատման օգտին և պատրաստ է բանակցություններ վարել Արցախի Հանրապետության կարգավիճակի վերջնական որոշումից հետո այդ խաղաղության հասնելու ուղիների վերաբերյալ: Հիշենք, որ քաղաքական կարգավորման բանակցությունները պետք է սկսվեն հումանիտար հարցերի լուծումից և եռակողմ հայտարարության պայմանների կատարումից հետո, որում ոչ մի հիշատակություն չկա Արցախի՝ որպես Ադրբեջանի տարածք ճանաչման մասին:
