Հայաստանում ինչքան ժանգոտած մեխ կա՝ տարբեր պաշտոնների ծվարած հանելու ենք ու մխելու ենք որտեղ անհրաժեշտ է. Փաշինյան

Այս ընտրություններով ՀՀ քաղաքացիները հնարավորություն ունեն հոկտեմբերի 27-ի կազմակերպիչներին պատասխան տալ: Արարատում քարոզաշավի ժամանակ հայտարարեց Նիկոլ Փաշինյանը և նշեց, որ նախորդ տարվա փետրվարին հոկտեմբերի 27-ի գործի նախաքննությունը, տուժողի իրավահաջորդ Անահիտ Բախշյանի դիմումի հիման վրա, վերաբացվել է, սակայն կորոնավիրուսի և պատերազմի պատճառով գործի քննությունը հետաձգվել է. 

«Ձեր քվեարկությամբ կարող եք առանձնահատուկ պարտավորություն և պատասխանատվություն դնել մեր դատաիրավական մարմինների վրա, որպեսզի այդ գործերն ամենայն խորությամբ քննվեն և գործադրվեն բոլոր հնարավոր միջոցները այդ գործը բացահայտելու համար»,-ասաց Փաշինյանը: 

Փաշինյանը հորդորեց քաղաքացիներին քվերակել իրենց օգտին, որպեսզի Հայաստանում հաստատեն օրենքի և իրավունքի դիկտատուրա: 
Փաշինյանը կրկին ցույց տվեց քարոզարշավի ընթացքում նվեր ստացած իր մուրճն ու հայտարարեց. 

«Պողպատե մանդատով Հայաստանում ինչքան ժանգոտած մեխ կա՝ տարբեր պաշտոնների ծվարած, նրանց բոլորին հանելու ենք, որտեղ անհրաժեշտ է նրանց մխելու ենք, որտեղ անհրաժեշտ է՝ ջարդելու ենք»: