ՏԵՍԱՆՅՈՒԹ. Պետք է բացառեիք խնամի, ծանոթ սկզբունքը, բայց տեսնում ենք լրիվ հակառակ պատկերը. պատգամավորը՝ Պապիկյանին

Դուք ի՞նչ գնահատական եք տալիս այս խնամի, ծանոթ, բարեկամ սկզբունքին: Դուք այն իշխանությունն եք, որ պետք է բացառեիք սա, բայց մենք տեսնում ենք լրիվ հակառակ պատկերը ձեր գերատեսչության ներքո: Այս մասին այսօր Ազգային ժողովում հարց ուղղեց «Լուսավոր Հայաստան» խմբակցության պատգամավոր Արմեն Եղիազարյանը տարածքային կառավարման և ենթակառուցվածքների նախարար Սուրեն Պապիկյանին:

Պատգամավորը հիշեցրեց, որ  Hetq.am-ը օրեր առաջ հրապարակում էր իրականացրել, որում նշվում էր, որ  «Ճանապարհային դեպարտամենտ» ՊՈԱԿ-ի տնօրեն Ստեփան Մաչյանիը ըստ հոդվածի, փոխվարչապետ Տիգրան Ավինյանի և նրա նախկին խորհրդական Դավիթ Մանուկյանի ընկերն է։ Բացի դրանից, աշխատանքի և սոցիալական հարցերի նախկին նախարար Զարուհի Բաթոյանի քրոջ ամուսնու եղբայրն է:

«Դուք ի՞նչ գնահատական եք տալիս այս խնամի, ծանոթ, բարեկամ սկզբունքին: Դուք այն իշխանությունն եք, որ պետք է բացառեիք սա, բայց մենք տեսնում ենք լրիվ հակառակ պատկերը ձեր գերատեսչության ներքո»- ասաց Արմեն Եղիազարյանը:
 

Սուրեն Պապիկյանն արձագանքեց.«Դուք էլ Էդմոն Մարուքյանի ընկերն եք, այդ ի՞նչ խայտառակ բան է ստացվել, դուք նույն ֆրակցիայի պատգամավոր եք, քաղաքականությունը ու նաև վստահությունը սրա հիման վրա է, այստեղ խնամի, ծանոթ, բարեկամ սկզբունք չկա: Մրցութային կարգին համապատասխան մրցույթներ են իրականացվում։ Ո՞վ է մասնակցել, որ պարտվել է, ո՞ւմ են փորձել օգնել, եթե հանիրավի բան է եղել, ո՞ւմ են բողոքել, որտեղ են բողոքել, եթե այս հարցերի պատասխանը կունենաք և կպարզվի, որ իմ գերատեսչությունում տեղի է ունենում մի պրոցես, որտեղ խնամի, ծանոթ սկզբունքի հիման վրա մեկին առավելություն են տալիս, մյուսին ոչ, այդ ժամանակ էլ կխոսենք»:

Արմեն Եղիազարյանն ասաց, որ իր ընկերությունը Էդմոն Մարուքյանի հետ կապ չունի: «Խոսքը այստեղ վերաբերում է նրան, որ Դուք այդ պրոցեսում տիրապետում եք բյուջե, և մենք տվյալ դեպքում չենք տիրապետում բյուջե և պետական բյուջեի հետ կապ չունենք»,- ասաց նա:

Սուրեն Պապիկյանը նշեց, որ Հայաստանում բարեկամական ու ընկերական կապերը շատ են, ամուր են: «Բայց միևնույն ժամանակ պետք է նշեմ, որ մասնավորապես Ստեփան Մաչյանը շատ լավ կառավարիչ է, իրեն դրսևորել է թե՛ մասնավոր ոլորտում, թե՛ Սոցապնախարարությունում և այդ մարդու աշխատանքը տեսնելով՝ հրավիրել ենք գերատեսչություն աշխատելու»,-հավելեց նա:

Մանրամասները՝ tert.am-ի տեսանյութում