Խիստ պատիժներ կսահմանվեն պատերազմի ժամանակ որոշ գործողությունների համար

Հայաստանի Ազգային ժողովը հոկտեմբերի 27-ին կայացած արտահերթ նստաշրջանի ընթացքում առաջին ընթերցմամբ հաստատեց Քրեական օրենսգրքում փոփոխությունները՝ նախատեսելով ավելի խիստ պատիժներ պատերազմի ժամանակ որոշ գործողությունների համար:

Մասնավորապես, ռազմական դրության եւ պատերազմի ժամանակ ժամկետային զինվորական ծառայությունից, ուսումնական հավաքներից կամ մոբիլիզացիայից խուսափելը կպատժվի 6-12 տարվա ազատազրկմամբ, նախկինում նախատեսված 4-8 տարվա փոխարեն:

Նրանց համար, ովքեր կխուսափեն զինվորական հնազանդությունից կամ պատերազմի ընթացքում հարկեր վճարելուց, առավելագույն պատիժը ոչ ավելի, քան 4 տարի ժամկետով ազատազրկումից փոխվել է 1-5 տարվա ազատազրկմամբ։

Պատերազմում հրամանը չկատարելու համար պատիժը 5-15 տարվա ազատազրկումից կփոխվի 8-15 տարվա ազատազրկման:

Բացի այդ, ռազմական դրության, պատերազմի ժամանակ կամ մարտական իրավիճակում կատարված դասալքությունը կպատժվի 8-15 տարվա ազատազրկմամբ՝ նախկինում հաստատված 6-12 տարվա փոխարեն:

Օրինագիծը ներկայացնող պաշտպանության փոխնախարար Գաբրիել Բալայանի խոսքով, այս օրինագծի ընդունումը պայմանավորված է նրանով, որ քաղաքացիները զերծ մնան նման արարքներից, քանի որ արդեն կան անձինք, որոնց դեմ այս հոդվածներով քրեական գործեր են հարուցվել:

Հիշեցնենք, որ խորհրդարանականներն առաջին ընթերցմամբ միաձայն հաստատել են Քրեական օրենսգրքում փոփոխություններ կատարելու մասին նախագիծը: