Սամբոյի միջազգային մրցաշարերը հետաձգվել են մինչև աշուն
Կորոնավիրուսի վարակի տարածման պատճառով սամբոյի միջազգային ֆեդերացիան որոշել է մինչև աշուն հետաձգել միջազգային օրացույցով նախատեսված բոլոր մրցաշարերը: Այդ մասին հայտնում է ՀԱՕԿ-ի պաշտոնական կայքը։ Մրցումների անցկացման հստակ ժամկետների մասին կծանուցվի համավարակի հետ կապված սահմանափակումների վերացումից հետո։ Ավելի վաղ Եվրոպայի ֆեդերացիայի գործկոմը որոշել էր 2020թ. Եկատերինբուրգում նշանակված Եվրոպայի առաջնությունը մայիսից տեղափոխել սեպտեմբեր։ Սամբոյի միջազգային ֆեդերացիան հայտարարել է, որ կսպասի իրադարձությունների հետագա զարգացման ընթացքին և հորդորում է առողջությունը պահպանելու համար խուսափել ցանկացած ռիսկերից։
