Հայկ Կոնջորյանի եղբայրը դատված լինելով՝ ներկայացրել է դատվածություն չունենալու տեղեկանք. Քրիստինե Վարդանյան

«Հայաստան» խմբակցության պատգամավոր Քրիստինե Վարդանյանը խորհրդարանում անդրադարձել է ՔՊ խմբակցության ղեկավար Հայկ Կոնջորյանի եղբոր՝ Ավետ Կոնջորյանի շուրջ հրապարակված տեղեկություններին՝ պնդելով, որ վերջինս օրենքի առաջ արտոնյալ վերաբերմունքի է արժանացել։

Վարդանյանի խոսքով՝ Ավետ Կոնջորյանը 2025 թվականի հուլիսի 1-ին մեկ տարով զրկվել էր վարորդական իրավունքից, սակայն երեք ամիս անց կրկին հայտնվել էր մեքենայի ղեկին։ Այդ դեպքով, նրա խոսքով, քրեական վարույթ է նախաձեռնվել, որի ընթացքում ներկայացվել է տեղեկանք, թե նա դատվածություն չունի։

Պատգամավորը պնդել է, որ իրականում Ավետ Կոնջորյանը 2010 թվականին դատապարտվել է խարդախության հոդվածով, իսկ այդ տեղեկությունը վարույթն իրականացնող մարմնին չի ներկայացվել, ինչի հետևանքով, նրա գնահատմամբ, վերջինս ստացել է օրենքով նախատեսվածից ավելի մեղմ պատիժ։

«Եթե Ավետ Կոնջորյանը չլիներ Հայկ Կոնջորյանի եղբայրը, հնարավորություն կունենա՞ր ՆԳՆ-ից ստանալ տեղեկանք, թե դատված չի եղել, և դրա արդյունքում ավելի մեղմ պատիժ ստանալ։ Իմ միանշանակ պատասխանը՝ ոչ է»,- հայտարարել է Վարդանյանը։

Նա նաև քննադատել է Հայկ Կոնջորյանի՝ եղբոր գործողություններից հրապարակայնորեն տարանջատվելու հայտարարությունները՝ նշելով, որ, իր կարծիքով, եթե պաշտոնյայի ընտանիքի անդամները նման արտոնություններից չօգտվեին, այդ կապը հանրային քննարկման թեմա չէր դառնա։