Եթե «Զանգեզուրի միջանցքը» բացվի, Ստամբուլից Բաքու կհասնեն գնացքով և ավտոմեքենայով. Հաջիև

Ադրբեջանի նախագահի օգնական Հիքմեթ Հաջիևը CNN Turk-ին հայտնել է, որ այսպես կոչված «Զանգեզուրի միջանցքի» գործարկումը Թուրքիայի ու Ադրբեջանի համար կստեղծի տրանսպորտային նոր հեռանկարներ։

Հաջիևի համաձայն՝ ադրբեջանական կողմն արդեն մոտ է տրանսպորտային ենթակառուցվածքների կառուցման ավարտին։ Բաքվից դեպի Զանգելան և Հայաստանի սահման տանող ավտոճանապարհներն ու երկաթգիծը կառուցման վերջնական փուլում են, իսկ Նախիջևանի երկաթուղային հատվածը վերականգնված է։

Նա նաև մատնանշել է, որ Թուրքիան Կարսի ու Իգդիրի միջև նոր երկաթգիծ է կառուցում, որը ներառվելու է տարածաշրջանային նոր տրանսպորտային ցանցում։

«Եթե «Զանգեզուրի միջանցքը» բացվի, Ստամբուլից Բաքու հնարավոր կլինի հասնել ավտոմեքենայով կամ գնացքով։ Դա այդքան էլ հեռու հեռանկար չէ։ Ակտիվ դիվանագիտական աշխատանքն ու ենթակառուցվածքների շինարարությունը շարունակվում են»,- նշել է Հաջիևը։

Հարցազրույցի ընթացքում նա նաև պնդել է, որ Հայաստանն ԱՄՆ-ի հետ միասին պարտավորվել է ավարտին հասցնել մոտ 42 կիլոմետր երկարություն ունեցող պակասող հատվածի կառուցումը։

Ադրբեջանի նախագահի օգնականի փոխանցմամբ՝ նշված աշխատանքների ավարտից հետո կստեղծվեն առևտրի և փոխադրումների նոր հնարավորություններ։