![Մեծ Բրիտանիան մտադիր է արգելել բենզինով և դիզելային վառելիքով աշխատող մեքենաների վաճառքը](https://auroranews.am/storage/img/base_image/old/29f487205c62643e1ea19966f31f41d2.webp)
Մեծ Բրիտանիան մտադիր է արգելել բենզինով և դիզելային վառելիքով աշխատող մեքենաների վաճառքը
![Մեծ Բրիտանիան մտադիր է արգելել բենզինով և դիզելային վառելիքով աշխատող մեքենաների վաճառքը](https://auroranews.am/storage/img/base_image/old/29f487205c62643e1ea19966f31f41d2.webp)
Մեծ Բրիտանիայի կառավարությունը մտադիր է մինչև 2035 թվականը արգելել ներքին այրման շարժիչներով մեքենաների վաճառքը, որոնք աշխատում են բենզինով կամ դիզելային վառելիքով, ասվում է վարչապետ Բորիս Ջոնսոնի գրասենյակի տարածած հաղորդագրությունում:
Դաունինգ Սթրիթը խոստովանում է, որ սահմանափակումները կարող են ուժի մեջ մտնել նույնիսկ ավելի վաղ, եթե հնարավոր լինի էլեկտրական մեքենաների ավելի արագ անցում կատարել:Չի բացառվում, որ այս արգելքը կազդի հիբրիդային մեքենաների վաճառքի վրա ևս:
Ջոնսոնի խոսքով՝ Բրիտանիան մտադիր է մինչև 2050 թվականը հասնել մթնոլորտ վնասակար արտանետումների զրոյական մակարդակի.
«2020 թվականը պետք է լինի յուրաքանչյուրի համար ավելի մաքուր և կանաչ ապագայի սկիզբ»,-ասել է վարչապետը: Ըստ Մեծ Բրիտանիայի տրանսպորտի նախարար Գրանթ Շապսի, կառավարությունը իրականացնում է 1,5 միլիարդ ֆունտ արժողությամբ ծրագիր, որը կբարձրացնի էլեկտրական տրանսպորտային միջոցների տարածվածության մակարդակը: Անցած տարի երկրում էլեկտրական մեքենաները վաճառվում էին յուրաքանչյուր 15 րոպեն մեկ:
Բենզինով կամ դիզելային վառելիքով մեքենաների վաճառքից հրաժարվելու մտադրության մասին Մեծ Բրիտանիայի կառավարությունը հայտարարել է դեռևս 2017 թվականի հուլիսին: Այն ժամանակ պլանավորվում էր, որ արգելքը ուժի մեջ կմտնի 2040 թվականին: Այդ ժամանակ նման խոստում է տվել նաև Ֆրանսիայի կառավարությունը: Իսկ ահա Շվեդիան որոշել է արգելել ներքին այրման շարժիչներով մեքենաների վաճառքը մինչև 2030 թվականը:
Greenpeace-ի տվյալներով, դիզելային վառելիքներով աշխատող մեքենաներից հրաժարվելու մտադրություն են հայտնել նաև Իսպանիան, Դանիան, Ֆինլանդիան, Նորվեգիան, Նիդերլանդները, Իռլանդիան, Սլովենիան և Իսրայելը: