Հայաստանյան պատվիրակությունը կայցելի Ադրբեջան. Գրիգորյան

ՀՀ ԱԱԽ քարտուղար Արմեն Գրիգորյանը Բրյուսելում նշել է, որ օգոստոսի 8-ից ի վեր Հայաստանը և Ադրբեջանը համատեղ քայլեր են ձեռնարկում երկխոսությունը խորացնելու և մինչ օրս արձանագրված առաջընթացը ամրապնդելու համար։

Գրիգորյանը օրինակ է բերել հոկտեմբերի 21–22-ին Ադրբեջանի քաղաքացիական հասարակության ներկայացուցիչների պատվիրակության այցը Հայաստան՝ երկկողմ կլոր սեղանին մասնակցելու նպատակով։ Նրա խոսքով՝ առաջիկայում Հայաստանի քաղաքացիական հասարակության ներկայացուցիչներն էլ կայցելեն Ադրբեջան։ Նախքան այդ՝ Հայաստանի Ազգային անվտանգության ծառայության ղեկավարը մասնակցել էր Բաքվում կայացած միջազգային անվտանգության ֆորումին։ Գրիգորյանը նշել է, որ նման այցերն ու շփումները կնպաստեն երկու երկրների հասարակությունների միջև վստահության ամրապնդմանը և խաղաղության գործընթացի զարգացմանը։

Հիշեցնենք՝ անցյալ ամիս Երևանում անցկացվել էր երկկողմ կլոր սեղան՝ Հայաստանի և Ադրբեջանի քաղաքացիական հասարակության ներկայացուցիչների մասնակցությամբ։ Հանդիպման նպատակն էր խթանել խաղաղության օրակարգը՝ 2025 թվականի օգոստոսի 8-ին Վաշինգտոնում ընդունված համատեղ հռչակագրի դրույթների հիման վրա։

Կլոր սեղանին ադրբեջանական կողմից մասնակցել են Ֆարհադ Մամեդովը, Ռուսիֆ Հուսեյնովը, Ռամիլ Իսղանդերլին և Կամալա Մամեդովան, իսկ հայկական կողմից՝ Արեգ Քոչինյանը, Բորիս Նավասարդյանը, Նաիրա Սուլթանյանը, Նարեկ Մինասյանը և Սամվել Մելիքսեթյանը։