«Արևմտյան Ադրբեջան» նախագիծը՝ հնարավոր պահանջների հիմք Հայաստանի նկատմամբ. վերլուծաբան

Շվեդ լրագրող Ռասմուս Կանբեկը գրել է, որ «Արևմտյան Ադրբեջան» նախաձեռնությունը ֆինանսավորվում և համակարգվում է Ադրբեջանի նախագահի աշխատակազմի կողմից։

Նրա հրապարակած փաստաթղթերի արտահոսքը ցույց է տալիս, որ Բաքուն կազմակերպել և ֆինանսավորել է միջազգային արշավ՝ այն ներկայացնելով որպես հումանիտար ծրագիր։ Լրագրողի խոսքով՝ իրականում նախաձեռնությունը պարունակում է տարածքային նկրտումներ և ուղղված է Հայաստանի նկատմամբ հնարավոր պահանջների ներկայացմանը։

Կանբեկը նշել է, որ «Արևմտյան Ադրբեջան» տերմինը վերաբերում է ոչ թե Ադրբեջանին, այլ Հայաստանի տարածքին։ Նախաձեռնությունը ներկայացվում է որպես հումանիտար նախաձեռնություն՝ նպատակ ունենալով ապահովել «անվտանգ և արժանապատիվ վերադարձ» այն ադրբեջանցիների համար, որոնք վերաբնակեցվել են Հայաստանից 1980-ականների վերջերին և 1990-ականների սկզբներին։

Լրագրողի տվյալներով՝ 2023 թվականի դեկտեմբերի 5–6-ին Բաքվում անցկացված «Հայաստանից արտաքսված ադրբեջանցիների անվտանգ և արժանապատիվ վերադարձի ապահովում․ գլոբալ համատեքստ և արդար լուծում» թեմայով համաժողովի համար ծախսվել է ավելի քան 109 հազար մանաթ (մոտ 65 հազար ԱՄՆ դոլար)՝ ընդգրկելով մասնակիցների բնակության, աուդիովիզուալ ձևավորման և թվային հարթակի ծախսերը։