Աբովյանի նախկին ղեկավարը մեղադրվում է կոռուպցիոն գործով

ՀՀ հակակոռուպցիոն կոմիտեում քննված բազմադրվագ քրեական վարույթի շրջանակում պարզվել է, որ 2008-2015 թվականներին Աբովյան համայնքի ղեկավարի պաշտոնը զբաղեցրած Կարապետ Գուլոյանը իր պաշտոնեական դիրքն օգտագործել է ծառայության շահերին հակառակ՝ համայնքի վարչական տարածքում գտնվող ընդհանուր օգտագործման 65 հողատարածք, այդ թվում՝ հրապարակներ, ճանապարհներ, զբոսայգիներ ու պուրակներ, ապօրինի օտարելով տարբեր անձանց։

Նախաքննությամբ հիմնավորվել է, որ հողատարածքների օտարման ընթացքում Գուլոյանը մի շարք դեպքերում խախտել է հրապարակային սակարկությունների անցկացման կարգը և քաղաքապետարանի պաշտոնատար անձանց հետ կատարել է պաշտոնեական կեղծիքներ՝ ստորագրելով կեղծ արձանագրություններ։

Բացի այդ, նախնական համաձայնությամբ փոխկապակցված անձանց հետ Գուլոյանը օրինականացրել է հանցավոր եղանակով ձեռք բերված հողատարածքները՝ ձևական գործարքների միջոցով դրանք գրանցելով իր կամ հարազատների անունով։

Աբովյանի նախկին ղեկավարին մեղադրանք է ներկայացվել ՀՀ նախկին քրեական օրենսգրքի մի շարք հոդվածներով՝ այդ թվում 308-րդ (պաշտոնեական լիազորությունների չարաշահում), 190-րդ (գույքի օրինականացում), 314-րդ (պաշտոնեական կեղծիք) և 196-րդ (գույքի յուրացում) հոդվածներով։

Կարապետ Գուլոյանը ընդունել է իրեն առաջադրված մեղադրանքները և ամբողջությամբ փոխհատուցել համայնքին պատճառված 261 մլն դրամի վնասը։ Նրա նկատմամբ կիրառվել են համակցված այլընտրանքային խափանման միջոցներ՝ 40 մլն դրամ գրավ և Հայաստանի Հանրապետությունից դուրս չգալու արգելք։

Գուլոյանի և ևս երեք անձանց վերաբերյալ նախաքննությունն ավարտվել է, գործը մեղադրական եզրակացությամբ փոխանցվել է դատախազին՝ դատարան ուղարկելու համար։