Կրթվե’նք և որակները չայլասերե’նք. Աննա Հակոբյան
Աննա Հակոբյանը սոցցանցի իր էջում մեջբերումներ է արել Կոնֆուցիուսից:
«Սաներից մեկն ասաց. «Բարձր արժանիքներով մարդը նախ շահում է մարդկանց վստահությունը, ապա նոր միայն մոբիլիզացնում նրանց: Առանց այս վստահության մարդիկ իրենց չարամտորեն օգտագործված կզգան:
Բարձր արժանիքներով մարդը նախ շահում է իր արքայազնի վստահությունը, ապա նոր միայն քննադատում նրան: Առանց այս վստահության արքայազնն իրեն զրպարտված կզգա»:
The Text of The Analects, Chapter 19, 19.10.
Դուքսը հարցրեց Կոնֆուցիուսին. «Ես ի՞նչ պետք է անեմ, որպեսզի մարդիկ լինեն հարգալից, հավատարիմ և ջանասեր»:
Վարպետը պատասխանեց. «Նրանց հետ արժանապատվորեն վարվի՛ր, և նրանք կլինեն հարգալից: Դու ինքդ եղի՛ր լավ հայր և լավ զավակ, և նրանք կլինեն հավատարիմ: Տեղ տու՛ր ուժեղներին և կրթի՛ր անկարողներին, և նրանք կլինեն ջանասեր»:
The Text of The Analects, Chapter 2, 2.20.
Վարպետն ասաց. «Եթե մեկը կարող է երկիրը կառավարել` հավատարիմ մնալով արժեքներին և հարգանք դրսևորելով, ապա ուրիշ ոչինչ չկա սրան ավելացնելու: Եթե մեկը չի կարող կառավարել` հավատարիմ մնալով արժեքներին և հարգանք դրսևորելով, ապա ի՞նչ իմաստ ունեն արժեքներն առհասարակ»:
The Text of The Analects, Chapter 4, 4.13.
Վարպետն ասաց իր սանին.
- Լսե՞լ ես արդյոք վեց որակների և նրանց վեց այլասերումների մասին:
- Ոչ:
- Նստիր, ես հիմա քեզ կբացատրեմ: Այսպես ուրեմն՝
1. Մարդկայնություն. առանց կրթվելու` այն վերածվում է հիմարության:
2. Ինտելեկտ. առանց կրթվելու` այն վերածվում է թեթևամտության:
3. Ասպետություն. առանց կրթվելու` այն վերածվում է ավազակության:
4. Անկեղծություն. առանց կրթվելու` այն վերածվում է դաժանության:
5. Քաջություն. առանց կրթվելու` այն վերածվում է բռնության:
6. Ուժ. առանց կրթվելու`այն այլասերվում է, վերածվում` անարխիայի:
The Text of The Analects, Chapter 17, 17.8.
Հ.Գ. Եւ կրկին՝ կարդալիս պետք է միշտ մտապահենք, որ այս մտքերն արտահայտվել են մեզանից 2570 տարի առաջ:
Դա կստիպի վերանայել այն ծայրահեղ կարեւորությունը, որով շոյում ենք ինքներս մեզ եւ մեր հսկայական էգոն։ Կստիպի չափել այն իմաստությունը, որ ձեռք ենք բերում 50-60 տարվա տեւողությամբ մեր գիտակցական կյանքի ընթացքում, որից, ընդ որում, հազիվ 15 տարին ենք նվիրում կրթվելուն:
Եւ վերջապես՝ կստիպի նորից գիտակցել, թե որքա՜ն անցողիկ և աննշան է մեր գոյությունը, և որքա՜ն հին և մնայուն է այն արատը, որի օրենքներով ապրելով վատնում ենք մեր այս փոքրիկ եւ աննշան կյանքը։
Կոնֆուցիուսից 2570 տարի անց, կրթվե՛նք և մեզ հղկե՛նք, կրթվե՛նք և բարձր արժանիքներով օժտվե՛նք, կրթվե՛նք և որակ ստանա՛նք, կրթվե’նք եւ որակները չայլասերե’նք, կրթվելը նորաձեւ է»,- գրել է Հայաստանի վարչապետի կինը՝ Աննա Հակոբյանը:
