Վանաձորում տանիքի փլուզման հետևանքով մեկ անձ է մահացել. մանրամասներ ողբերգական դեպքից
Փրկարար ծառայությունը հրապարակել է մանրամասներ Վանաձորում տեղի ունեցած փլուզման դեպքից, որի արդյունքում զոհվել է մեկ մարդ։
Հաղորդագրության մեջ նշվում է, որ տան շինարարական աշխատանքների ընթացքում տեղի է ունեցել տանիքի և առաստաղի մոտ 20 քմ հատվածի մասնակի փլուզում, ինչի հետևանքով քաղաքացին մնացել է փլատակների տակ։
Նոյեմբերի 3-ին՝ ժամը 15:56-ին, Լոռու մարզային փրկարարական վարչության ճգնաժամային կառավարման կենտրոնը ահազանգ է ստացել, որ Վանաձորի Տարոն 4 թաղամասի Լեռնային փողոցի տներից մեկում փլուզում է տեղի ունեցել։ Փրկարարները հատուկ տեխնիկայի օգնությամբ փլատակներից դուրս են բերել քաղաքացու դին։
