Հայտնի են՝ Երևանում 23-ամյա չեչենուհի Այշատ Բայմուրադովայի սպանության գործով կասկածյալների անունները

«Осторожно, новости» տելեգրամյան ալիքը հայտնում է, որ Երևանում սպանված չեչեն Այշատ Բայմուրադովայի գործով հնարավոր կասկածյալների ինքնությունները հայտնի են։

Աղջկա մարմինը հայտնաբերվել էր հոկտեմբերի վերջին։ Նշվում է, որ նրա մահվան օրը բնակարանից, որտեղ գտնվել էր մարմինը, դուրս են եկել Բայմուրադովայի ծանոթ Կարինա Իմինովան և 30-ամյա չեչեն Սաիդ-Խամզատ Բայսարովը։ Հաղորդման համաձայն՝ Բայսարովը 2018 թվականին Ռուսաստանում մեղադրվել էր «Իսլամական պետություն» ահաբեկչական կազմակերպությունը ֆինանսավորելու մեջ, սակայն դատարանը նրան արդարացրել է։ Նրա դեմ հարուցվել են նաև գործեր կողոպուտի և ալկոհոլի ազդեցության տակ մեքենա վարելու համար։

Տեսախցիկների ձայնագրություններում Իմինովան և Բայսարովը նկատվել են այն շենքի մուտքում, որտեղ հայտնաբերվել էր Բայմուրադովայի մարմինը։ Ենթադրվում է, որ ենթադրյալ սպանությունից հետո նրանք լքել են Հայաստանը և վերադարձել Ռուսաստան։

Աղբյուրի տեղեկություններով՝ քննությունը տեղյակ է այս անձանց ինքնություններից, սակայն նրանք պաշտոնապես չեն համարվում կասկածյալներ և չեն գտնվում հետախուզման մեջ։

«Սա մտահոգություն է առաջացնում, որ գործը կարող է փակվել։ Սկսվել է սպանության հետաքննություն՝ հիմնված վկաների ցուցմունքների և տեսախցիկների տեսագրությունների վրա։ Հանցավայրում ֆիքսվել են երկու անձինք, որոնք արագ հեռացել են, սակայն նրանց նկատմամբ հետախուզում չի հայտարարվել»,– ալիքը մեջբերում է СК SOS ճգնաժամային խմբի իրավապաշտպաններին։

Հիշեցնենք, որ հոկտեմբերի 19-ին ՀՀ ոստիկանությունը հայտնել էր Բայմուրադովայի մարմինը հայտնաբերելու մասին։ Նա անհետ կորել էր հոկտեմբերի 17-ին, իսկ ՀՀ քննչական կոմիտեն քրեական վարույթ էր նախաձեռնել սպանության փաստով։