Քննիչներն աշխատում են անմարդկային պայմաններում․ Փաշինյան

Ես ինքս էլ հաճախ ասել եմ, որ չեմ կարող ասել, թե շատ բավարարված եմ կոռուպցիոն գործերի, պետական պաշտոնյաների հետ կապված գործերի քննության արդյունքներով: Այս մասին, այսօր` նոյեմբերի 29-ին, ՀՔԾ ծառայողի մասնագիտական օրվա առթիվ իր ելույթում նշեց վարչապետ Նիկոլ Փաշինյանը։

Նրա խոսքով, սա շատ հեշտ է արձանագրել քաղաքական մակարդակում, բայց երբ խորանում են դետալների մեջ եւ արձանագրում փաստեր, տեսնում են, որ հսկայածավալ աշխատանք է կատարված. «Մենք ունենք մեծ խնդիր քննիչների ծանրաբեռնվածության առումով: Քննիչների միջին ծանրաբեռնվածությունը երբ ուսումնասիրում ենք, տեսնում ենք, որ մարդիկ աշխատում են անմարդկային պայմաններում»,-ասաց վարչապետը:

 Նա շնորհակալություն հայտեց դրա համար քննիչներին, դատախազության աշխատակիցներին ապա հավելեց. «Սա մեր պետական գողգոթայի ճանապարհն է, մենք այս տառապանքների միջով պետք է անցնենք, որ մեր երկիրը դուրս բերենք նոր բարձունքների: Իհարկե, մենք պետք էմտածենք մեր քննիչների սոցիալական երաշխիքների մասին: Անընդհատ ՀՔԾ պետը այս հարցը բարձրացնում է կառավարության առջեւ եւ միտ չէ, որ ձեզ համար ցանկալի արձագանքի է արժանանում, բայց այդ օրակարգը շատ կարեւոր է»,-ասաց նա: