«Մա՛մ, դժոխքը հենց էստեղ ա»․ Նաիրա Զոհրաբյանը կարդաց զինվորի նամակը

Ես լրագրողական շարք էի պատրաստել, զրուցել զինվորների հետ, թե ինչպես են վերաբերվում բանակում իրենց, մենք ունենք  բանակում ինքնասպանությունների տխուր վիճակագրություն։ Այս մասին այսօր ԱԺ պետական-իրավական հարցերի մշտական հանձնաժողովում ասաց պատգամավոր Նաիրա Զոհրաբյանը։ Նշենք, որ ԲՀԿ-ի պատգամավորնեները ներկայացրել են՝ ՀՀ քրեական օրենսգրքում լրացում կատարելու մասին նախագիծը: 

Նաիրա Զոհրաբյանը պատմել է, թե ինչպես իր լրագրողական գործունեության ժամանակ լինելով զորամասերում՝ մշտապես ականատես է եղել, իր խոսքով, «դեդավշինայի»։ 

Զոհրաբյանը ներկայացրեց միջազգային փորձը, որտեղ հանձնաժողովներում աշխատում են նորակոչիկների հետ և կարդաց մի զինվորի նամակ, ով հետո ինքնասպանություն է գործել:

««Մամ ջան, մենակ եմ, կուզեմ, որ ինձ էս վաշտից հանեք, մա՛մ, դժոխքը հենց էստեղ ա, մեր զորամասում», սրանք եզակի նամակներ չեն, մենք գործ ունենք ենթամշակույթի հետ»,-ասաց պատգամավորը:

Նշենք, որ նախագծով  առաջարկում է զորամասում զինծառայողին սպառնալիքի, բռնության, դաժան վերաբերմունքի և այլ եղանակներով անուղղակի դիտավորությամբ կամ անզգուշությամբ ինքնասպանության հասցնելը մեկ այլ զինծառայողի կողմից պատժել ազատազրկմամբ՝ 3-8 տարի ժամկետով, արարքը, որը կատարվել է մի խումբ անձանց, պետի, հրամանատարի կողմից, միևնույն անձի կողմից՝ պատժել 5-10 տարի ժամկետով ազատազրկմամբ, առավել ծանր դեպքերում՝ 7-10 տարի ժամկետով: