Փաշինյանն ու Ալիևը Վաշինգտոնի գագաթնաժողովից մեկ տարի անց հեռախոսազրույց են ունեցել

2026 թվականի օգոստոսի 8-ին ՀՀ վարչապետ Նիկոլ Փաշինյանը հեռախոսազրույց է ունեցել Ադրբեջանի նախագահ Իլհամ Ալիևի հետ։ Զրույցի ընթացքում ղեկավարները մտքեր են փոխանակել 2025 թվականի օգոստոսի 8-ին Վաշինգտոնում ԱՄՆ նախագահ Դոնալդ Թրամփի աջակցությամբ կազմակերպված Խաղաղության գագաթնաժողովի առաջին տարեդարձի կապակցությամբ, որի ընթացքում երկու երկրների միջև հաստատվել էր խաղաղություն և նախաստորագրվել խաղաղության համաձայնագրի տեքստը։

Կողմերն առանձնահատուկ ընդգծել են նախագահ Դոնալդ Թրամփի ու ԱՄՆ Կառավարության առանցքային դերակատարումը խաղաղության գործընթացի առաջմղման հարցում։ Նրանք փաստել են նաև վերջին մեկ տարում Հայաստանի և Ադրբեջանի հարաբերությունների կարգավորման ուղղությամբ արձանագրված առաջընթացը։

Հեռախոսազրույցում կարևորվել է երկկողմ առևտրատնտեսական կապերի ակտիվացումը՝ որպես խաղաղության տված օգուտների շոշափելի արդյունք։ Այս շրջանակում կողմերն անդրադարձել են ադրբեջանական նավթամթերքի՝ Հայաստան արտահանմանը, ինչպես նաև Ադրբեջանի տարածքով դեպի Հայաստան և Հայաստանից այլ ուղղություններ իրականացվող տարանցիկ բեռնափոխադրումներին։

Բացի այդ, զրուցակիցները քննարկել են Վաշինգտոնյան պայմանավորվածությունների համաձայն TRIPP երթուղու իրագործմանն առնչվող հարցեր։ Երկու երկրների ղեկավարները շեշտել են խաղաղության գործընթացն առաջ տանելու և տարածաշրջանում տևական խաղաղություն, կայունություն, կապակցվածություն ու տնտեսական համագործակցություն ապահովելու ուղղությամբ ջանքերի շարունակման անհրաժեշտությունը։