ՖԻՖԱ-ն արձագանքել է Ինֆանտինոյի նախկին սիրուհու շուրջ սկանդալային մեղադրանքներին

Ֆուտբոլի միջազգային ֆեդերացիան հանդես է եկել պաշտոնական հայտարարությամբ՝ անդրադառնալով կազմակերպության ղեկավարին ուղղված այն մեղադրանքներին, թե նա ՈւԵՖԱ-ի գլխավոր քարտուղար եղած ժամանակահատվածում փոխհատուցման վճարում է ապահովել իր նախկին սիրուհու համար։

«ՖԻՖԱ-ի նախագահ Ջանի Ինֆանտինոն լիովին հերքում է այս մեղադրանքները, դրանք չեն համապատասխանում իրականությանը։ Կանոնադրության կամ կանոնակարգերի խախտման վերաբերյալ ցանկացած ենթադրություն զրպարտչական բնույթ է կրում։ ՈւԵՖԱ-ի կամ ՖԻՖԱ-ի ոչ մի աշխատակից երբևէ բողոք չի ներկայացրել Ինֆանտինոյի գործողությունների դեմ՝ նրա մասնակցությամբ միջադեպերի բացակայության պատճառով։ Կադրային բոլոր որոշումները, ներառյալ աշխատանքից ազատումները և արձակման նպաստների վճարումները, հաստատվել են լիազորված ղեկավարների կողմից՝ գործող կանոններին խիստ համապատասխան»,- ասվում է ՖԻՖԱ-ի տարածած հայտարարության մեջ։

Ավելի վաղ լրատվամիջոցներում տեղեկություններ էին շրջանառվում, որ Ինֆանտինոն ՈւԵՖԱ-ում աշխատելու ընթացքում պաշտոնի առաջխաղացում է ապահովել իր սիրուհու համար և կազմակերպել նրան արձակման նպաստի հատկացումը։

Ինֆանտինոն ՈւԵՖԱ-ում աշխատանքի է անցել 2000 թվականի օգոստոսին։ Այդ կառույցի գլխավոր քարտուղարի պաշտոնը նա զբաղեցրել է 2009-ից 2016 թվականներին, իսկ 2016 թվականի փետրվարին ընտրվել է Ֆուտբոլի միջազգային ֆեդերացիայի նախագահ։