Վերելակի պոկվելու հետևանքով տուժած քաղաքացին հիվանդանոցում մահացել է

Երեկ երեկոյան ողբերգական դեպք էր տեղի ունեցել Երևան քաղաքում: Ազատամարտիկների փողոցի թիվ 78/15 շենքի մոտակայքում կառուցվող երկհարկանի ռեստորանային համալիրի բեռների տեղափոխման համար նախատեսված ամբարձիչը պոկվել և ընկել էր մոտ 12 մ բարձրությունից: Ներսում գտնվել են 2 քաղաքացիներ՝ Ա.Մ.-ն (ծնված 1960 թ.) և Է.Թ.-ն (ծնված 1974 թ.): 
Մինչ փրկարարների՝ կանչի վայր հասնելը տուժածներից մեկը հոսպիտալացվել էր ՙԷրեբունի՚ ԲԿ: 
Փրկարարները մյուս տուժածին մոտեցրել էին շտապօգնության ավտոմեքենային. վերջինս նույնպես հոսպիտալացվել էր ՙԷրեբունի՚ ԲԿ: Տուժածների առողջական վիճակը բժիշկները գնահատել էին ծայրահեղ ծանր: 
ՙԷրեբունի՚ ԲԿ-ից տեղեկություն է ստացվել, որ քաղաքացի Է.Թ.-ն մահացել է: