Բագրատաշենի անցակետի պետը գործարարի՞ է ծեծել. ՊԵԿ–ը պարզաբանում է
Բագրատաշենի անցակետում երեկ՝ հուլիսի 25–ին միջադեպ է տեղի ունեցել։
Ըստ Hraparak.am–ի՝ Բագրատաշենի մաքսակետի պետ Գեղամ Վանունին իր աշխատակիցների հետ ծեծի է ենթարկել գործարար Արթուր Խառատյանին եւ արգելել, որ նրա բեռը դուրս գա մաքսատան տարածքից։ Կայքի տեղեկություններով՝ Արթուր Խառատյանից խլել են բեռնատարի բանալին եւ մեքենան կալանավորել։ Գործարարը կատարվածի վերաբերյալ հաղորդում է ներկայացրել ԱԱԾ եւ ՊԵԿ։
Պետական եկամուտների կոմիտեից NEWS.am–ին հայտնեցին, որ հուլիսի 25-ին Բարգրատաշենի անցակետում տեղի ունեցած դեպքի առնչությամբ քննություն է ընթանում։
«Արեւելյան մաքսատուն-վարչության աշխատակիցները գործել են օրենքի տառին համապատասխան, ինչը կարող են փաստել նաեւ ականատեսները: Բացի այդ առկա են միջադեպի վերաբերյալ տեսագրություններ, որոնք հնարավորություն կընձեռեն համապատասխան մարմիններին պարզել իրականությունը։ Բոլոր այն անձինք, ովքեր գերազանցել են իրենց պաշտոնատական լիազորություններն ու պարտականությունները միանշանակ կկրեն օրենսդրությամբ սահմանված պատասխանատվության միջոցներ»,–հայտնեցին ՊԵԿ–ից։
ԱԱԾ–ից լրատվամիջոցին հայտնեցին, որ դեպքի վերաբերյալ իրենք հաղորդում չեն ստացել։
